SKÝRSLAN: Flautumark í dal draumanna
Hvað réði úrslitum?
Þetta var kannski ekki skemmtilegasti fótboltaleikur sem maður hefur horft á, lítið um opin færi og bæði lið vel skipulögð til baka. Það virtist sem bæði lið væru sátt við stig úr þessum leik en þegar þú ert með leikmann eins og Murielle Tiernan í þínu liði þá geta komið mörk þegar þú átt síst von á því. Frábært sigurmark á lokamínútu uppbótartímans eftir góðan undirbúning Söru réði úrslitum í kvöld.
Bestu leikmenn
1. Murielle Tiernan
Hún fær þennan titil fyrir þetta sigurmark sem tryggði Fram mjög mikilvæg þrjú stig. Það er alltaf hætta í kringum Murielle og varnarmenn geta ekki leyft sér að sofa á vaktinni þegar hún er í teignum.
2. Elaina Carmen La Macchia
Frábær markmaður sem er alltaf vel staðsett og gríðarlega örugg í teignum. Hún grípur allt sem í teiginn kemur og veitir varnarlínunni mikið öryggi.
Atvikið
Kemur ekkert annað til greina en sigurmarkið sem Murielle skoraði á lokamínútu uppbótartímans. Skorar gegn sínu fyrrum liðsfélögum í Tindastól og tryggir Fram sigurinn. Mikið af tilfinningum í þessu.
Hvað þýða úrslitin?
Fram fer upp í 6. sæti deildarinnar og eru komnar með níu stig eftir sjö umferðir. Tindastóll situr í 8. sætinu og eru enn með sex stig.
Vondur dagur
Laufey Harpa, ekki vegna frammistöðu heldur því hún þurfti að fara af velli á 21. mínútu vegna tognunar.
Dómarinn - 7
Vel dæmt hjá Bríeti og co.