SKÝRSLAN: Endurtekin martröð Leiknis í Keflavík
Hvað réði úrslitum?
Ólafur Hrannar Kristjánsson þjálfari Leiknis komst sennilega rétt að orði er hann sagði Keflavík einfaldlega margfalt betra lið en Leikni í dag. Sigurinn var vissulega sanngjarn og tilfinningin sú að Keflavík hefði eflaust getað unnið stærra ef þeir hefðu verið á fullu gasi allar 90 mínútur leiksins.
Bestu leikmenn
1. Kári Sigfússon
Er hægt að líta framhjá þrennu? Frábæri við teig Leiknis og uppskar þrjú góð mörk. Rökrétt framhald á góðum seinni hluta tímabilsins hjá þessum mjög svo skemmtilega karakter.
2. Sindri Snær Magnússon
Kraftur og áræðni og bara einn gír áfram á fullu. Stoðsendingar, tæklingar, barátta og almenn læti. Hvað viljið þið meira?
Atvikið
Mark Ernis Bjarnasonar. Snudda með vinstri í skeytin af 20 metrum. Hann mun reyna þetta aftur á næstu æfingu en mun aldrei takast það þó hann reyni þúsund sinnum.
Hvað þýða úrslitin?
Keflavík heldur toppsætinu og situr þar með 9 stig að loknum fjórum umferðum og stórgóða markatölu 13-4. Leiknir áfram á botni deildarinnar með 1 stig og alls ekki jafn góða markatölu 2-12
Vondur dagur
Varnarleikur Breiðhyltinga var á köflum dapur í dag. Mér fannst vanta upp á að ráðast á boltann enda unnu Keflvíkingar vel flesta seinni bolta og voru yfir í allri baráttu á vellinum heilt yfir. Stórt verkefni framundan hjá Ólafi Hrannari og hans teymi að berja trú í brjóst manna í efri byggðum Breiðholts.
Dómarinn - 8
Solid í dag hjá Gunnari Oddi og hans teymi. Rauði greifinn eins og ég hef kosið að kalla Gunnar Odd að undanförnu tók meira að segja upp á því að skilja rauða spjaldið eftir inn í klefa í þetta sinn. Sem var svo sem vel enda ekki nokkurt tilefni til þess að nota það.