SKÝRSLAN: Sterk byrjun Breiðhyltinga og mörk úr hornum
Hvað réði úrslitum?
Það var jafnræði með liðunum til þess að byrja með og ekki mikið um opin færi en í seinni hálfleik skoruðu ÍR-ingar fjórða leikinn í röð úr hornspyrnu, það eru 4 leikir búnir. Skiptingar Jóa og Davíðs breyttu leiknum líka en Bergvin Fannar var búinn að vera inn á í nokkrar sekúndur þegar hann skoraði 2. mark ÍR-inga og eiginlega kláraði leikinn.
Bestu leikmenn
1. Kristján Atli Marteinsson
Er ekkert smá mikilvægur fyrir þetta ÍR lið og er alltaf öflugur á miðjunni, hvað þá á grasinu í Mjóddinni. Stórkostlegur í kvöld og braut auðvitað ísinn eftir mikið baráttumark.
2. Emil Nói Sigurhjartarson
Byrjaði sinn fyrsta leik á tímabilinu og spilaði fantavel. Lagði upp annað markið á Begga eftir mikla baráttu. Var mjög góður án boltans og með boltann í dag hann Emil sem er skemmtilegur leikmaður. Menn eins og Ágúst Unnar, Kalli og Marc koma líka til greina sem voru stórkostlegir í dag líkt og mest allt ÍR liðið. Villi í markinu líka alltaf seigur.
Atvikið
Fyrsta mark leiksins þegar Kristján Atli braut ísinn. Það ætlaði allt um koll að keyra í Skógarselinu þegar boltinn söng í netinu eftir barning í teignum. Þetta setti tóninn fyrir ÍR-liðið og manni leið aldrei eins og Selfoss væri að fara að koma til baka eftir fyrsta markið.
Hvað þýða úrslitin?
ÍR-ingar halda áfram að byrja deildina vel og hafa byrjað fyrstu tvo heimaleikina á tveimur sigrum og hafa ekki fengið á sig mark. Þeir sitja í 3. sæti deildarinnar og eru taplausir. Selfyssingarnir eru í 10. sæti og geta farið niður í fallsæti ef Fjölnir nær í stig á móti Völsungi á morgun. En Selfyssingar hafa tapað þremur deildarleikjum í röð og fjórum með bikarnum.
Vondur dagur
Erfitt að benda á einn. Mér fannst takturinn úr Selfoss liðinu fara eftir að ÍR kemst yfir. Kannski er það bara sjálfstraust sem hitt liðið fær en það var ekki mikill kraftur í sóknarleik gestanna eftir fyrsta markið.
Dómarinn - 6
Mér fannst Sveinn dæma þetta ágætlega. Ekkert mjög mikið eða stórt að leiknum en mörg atvik samt sem áður sem maður er ósammála. Mér fannst t.d. Selfoss geta fengið vítaspyrnu í upphafi síðari hálfleik.