SKÝRSLAN: Stjörnumenn sáu ekki til sólar í seinni hálfleik
Hvað réði úrslitum?
Ef fyrsta korterið er tekið út fyrir sviga þá voru Vestramenn bara betri í þessum leik. Það var greinilegt að upplegg Stjörnunnar var að pressa Vestramenn hátt og það gekk mjög vel fyrstu fimmtán en eftir það bökkuðu þeir aðeins úr pressunni og Vestramenn gengu á lagið. Þegar Vestramenn jöfnuðu leikinn var þetta einhvernveginn aldrei spurning.
Bestu leikmenn
1. Daði Berg Jónsson (Vestri)
Eftir að hafa ekki sést allan leikinn náði Daði Berg að setja mark sitt á leikinn og það tvö. Þvílíkur leikmaður sem lét það ekki slá sig út af laginu að hafa ekki fengið úr miklu að moða stóran part leiksins og steig upp og var réttur maður á réttum stað í tvígang og fagnaði því að hætti hússins eins og honum einum er lagið. Hamingjuóskir á Daða sem útskrifaðist úr Verzló í dag!
2. Gunnar Jónas Hauksson (Vestri)
Mér fannst Gunnar Jónas mjög öflugur í dag sem sýndi sig kannski helst í því hvað Benedikt Warén átti erfiðan dag. Gunnar Jónas var orkumikill og agressívur í sínum varnarleik og kórónaði síðan góðan leik með frábæru marki. Einnig ber að nefna Eið Aron en það magn af sóknum andstæðingsins sem strandar á honum hefur orðið til þess að hann er búinn að vera einn besti maður mótsins hingað til og hélt hann uppteknum hætti í dag.
Atvikið
Jöfnunarmark Gunnars Jónasar setti tóninn fyrir seinni hálfleikinn en hann var algjörlega eign Vestra. Einnig var gaman að sjá Elmar Atla snúa aftur eftir tveggja mánaða bann frá knattspyrnu en honum var einstaklega vel tekið af stúkunni þegar hann trítlaði inn á völlinn í lok leiks.
Hvað þýða úrslitin?
Vestri fara upp í annað sæti deildarinnar á betri markatölu en Blikarnir sem eiga þó leik inni. Þá vantar aðeins tvö stig til að jafna þann stigafjölda sem þeir voru með þegar deildinni var skipt upp á síðasta tímabili sem verður að teljast ótrúlegur árangur.
Vondur dagur
Benedikt Warén átti ansi erfiða endurkomu á Ísafjörð í dag en hann var ólíkur sjálfum sér allan leikinn og lítið sem gekk upp hjá honum.
Dómarinn - 7
Mér fannst Helgi Mikael gera nokkuð vel í dag fyrir utan eitt gult spjald sem Guðmundur Kristjánsson átti klárlega að fá. Það var eitt vítakall sem Vestri áttu í stöðunni 1-1 en við látum það liggja á milli hluta hvort að sú ákvörðun hafi verið rétt eða ekki ég hreinlega er ekki viss.