Það var greinilegt að Víkingar voru búnir að greina það hvar var hægt að finna opnanir á vörn ÍA. Þeir skoruðu tvö mörk eftir alveg eins uppskrift þar sem Valdimar Þór kom með bolta frá hægri kanti á fjærstöngina, og Helgi Guðjónsson var þar mættur. Þeir reyndu þetta oftar en þessi tvö skipti sem þeir skoruðu og alltaf var það hættulegt. Þeir fengu svo klaufalegt mark á sig rétt fyrir hálfleiks lok en tilfinningin var þannig að sigurinn hjá heimaliðinu var aldrei í mikilli hættu.

Mark Skagamann var rosa klaufalegt af hálfu Víkinga, en á sama tíma glæsilegt hjá Hauki Andra. Víkingar eiga hornspyrnu og það endar enginn Víkings leikmaður á því að verjast þegar Haukur vinnur boltann og geysist upp völlinn. Hann tekur sprettinn frá eigin vítateig alla leið að vítateig Víkinga og hefur ennþá orkuna í að klára frábærlega framhjá Ingvari.

Víkingar fara tímabundið á topp deildarinnar með 17 stig. Breiðablik á hinsvegar eftir að spila á morgun og ef þeir vinna fara þeir fyrir ofan Víkinga. Skagamenn eru komnir í botnsæti deildarinnar, með sex stig eftir átta leiki.

Kannski auðveldast að klína þessu á hægri hlið öftustu varnarlínu Skagamanna þar sem bæði mörk Víkinga koma þar. Hlynur Sævar spilaði sem hægri hafsent í þriggja manna kerfi, en ég er ekki búinn að skoða mörkin nógu nákvæmlega til að segja til um hvort það var honum að kenna. Þannig bara hægri hliðin.

Heilt yfir vel dæmdur leikur að mínu mati. Það var mikil harka, og Skagamenn vildu meina að það var ekki dæmt jafnt. Það er mögulega hægt að týna til einhver smávægileg atriði sem styðja það, en ekkert sem hefur stór áhrif á leikinn. Það sem mér fannst hinsvegar verst er þegar Vilhjámur biður Dean um að setjast. Þá sest Dean bara í grasið, alveg stórkostlega fyndið atriði á staðnum fannst mér. Það fannst Vilhjálmi hinsvegar ekki og gaf honum gult spjald fyrir frábæran brandara.