„Ég held að þetta hafi ekki áhrif á leikinn. Þetta breytir aðeins aðdragandanum en þetta verður hrist úr hópnum á fyrsta degi ef það er eitthvað. Ég sé ekki að þessi umræða kosti okkur stig. Mér finnst þessi umræða vera óþörf,“ sagði Brynjar Björn Gunnarsson í sjónvarpsþætti Fótbolta.net og Kristján Guðmundsson tók undir með honum.

„Ég held að þetta hafi ekki áhrif á liðið. Ég held að menn vilji bara ennþá meira standa sig í leiknum á föstudaginn,“ sagði Kristján.

Tómas Þór Þórðarson var einnig gestur í þættinum og hann veltir þeirri spurningu upp hvort Viðari hefði verið refsað ef Lars Lagerback væri ennþá landsliðsþjálfari.

„Þetta landslið er byggt á hugmyndafræði Lars Lagerback. Hann talaði alltaf um að það væru ekki marga reglur en það væru guidelines. Ein af þeim er að það er ekki vín frá því að þú mætir og þangað til þú ferð. Viðar braut þá reglu ekki faktískt en þetta skýtur upp kollinum. Væri Viðar Örn Kjartansson í íslenska landsliðinu núna ef Lars Lagerback væri þjálfari?“

„Ég held að fréttirnar af þessu hafi engin áhrif á þessa stráka en þetta snýst meira um það sem er í gangi innan hópsins. Strákarnir vita að Viðar væri mögulega ekki með í hópnum ef Lars væri þarna. Er orðin breyting á þeirri dýnamík eftir að Heimir varð einn þjálfari? Þeir eru pottþétt að ræða það innan hópsins og það tekur frá leiknum.“

Brynjar Björn tók við orðinu af Tómasi. „Lars er farinn og við þurfum ekkert að tala um það mikið meira. Hann leggur grunn að þessu liði en núna eru Heimir og Helgi búnir að taka við og þeir búa til sínar reglur og venjur fyrir hópinn. Við þurfum ekki að tala mikið meira um söguna hjá Lars. Nú þurfum við að horfa fram veginn og sjá Heimi og Helga búa til sitt lið. Þeir takast á við þetta á sinn hátt,“ sagði Brynjar.

Hér að ofan má sjá spjallið í heild sinni.

Sjá einnig:
Sjónvarpið: Hvernig á byrjunarliðið að vera gegn Kosóvó?