Heimild: Akraborgin 

„Ég var að skutla mér eins og ég hef gert tíu þúsund sinnum áður í lífinu. Þetta var bara venjuleg skotæfing og ég var ekki að skutla mér neitt sérlega hátt. Olnboginn festist á einhvern hátt í grasinu og líkamsþunginn kom yfir, öxlin poppaði úr lið. Lítið ómerkilegt augnablik hafði svona mikil áhrif," segir Hannes sem var brattur í viðtalinu.

„Það eru margar slæmar hugsanir sem hellast yfir mann á svona „mómenti" en svo jafnar maður sig á því."

„Þegar svona gerist þá teygist á öllu í öxlinni og ýmislegt skemmist. Meiðslin geta verið af öllum toga en þú hefur tvo kosti; þjálfa upp öxlina og vona að þetta komi ekki fyrir aftur. Hinn kosturinn er að fara í aðgerð. Menn láta oftast reyna á fyrri kostinn en fyrir mörgum árum síðan fór ég oft úr axlarlið á vinstri öxlinni og ég reyndi að þjálfa öxlina upp en það gekk ekki. Nú vildum við skrúfa fyrir þetta strax."

Ef horft er á jákvæðu hliðarnar varðandi landsliðið þá gerir tímapunkturinn það að verkum að Hannes á að vera kominn í gott stand fyrir Evrópumót landsliða í Frakklandi á næsta ári.

„Það versta í þessu er að missa út taktinn með félagsliði mínu því núna er ég kominn í þetta frábæra tækifæri í Hollandi. Þetta er rosa gaman, deildin er stór og hver leikur stór upplifun. Mér var að ganga vel og það er hvað mest svekkjandi. Varðandi landsliðið á ég að geta komið þessu í stand í tæka tíð," segir Hannes sem leikið hefur vel fyrir NEC Nijmegen í Hollandi.

„Ég hefði betur sleppt því að skottast á þessa æfingu. Ég hefði ekki þurft að mæta á hana, þetta var bara „recovery" æfing en ég var fúll og pirraður eftir þennan leik og eftir svoleiðis er gott að fara út og æfa og blása aðeins út."