Blómvendir! Já ég skal segja ykkur það!

Fyrst kemur, að mér sýnist, formaður knattspyrnudeildar FH og gefur Flosa Eiríkssyni blómvönd fyrir sögulegan árangur í evrópu.

Síðan kemur Flosi sjálfur og afhendir Jasoni Daða blómvönd fyrir það að hann er að fara að spila leik nr 100 fyrir Breiðablik í dag!

Þetta er nú aldeilis!

Þá ganga liðin til búningsherbergja og gera sig klár í slaginn!

Blikar gera fjórar breytingar - Arnór Borg ekki í hóp Óskar Hrafn gerir fjórar breytingar frá leiknum gegn FC Struga þegar þeir tryggðu sér sæti í riðlakeppni í evrópu, fyrst allra liða á Íslandi. Þeir Ágúst Eðvald, Davíð Ingvars, Oliver Stefáns og Kristófer Ingi koma inn í liðið en Damir, Andri Rafn, Klæmint Olsen og Anton Logi detta úr liðinu.

Heimir Guðjónsson gerir þrjár breytingar frá 3-0 tapinu gegn KA á dögunum. Inn í liðið koma þeir Haraldur Einar, Kjartan Kári og Björn Daníel, sem er jafnframt fyrirliði FH-inga í dag. En Vuk, Arnór Borg og Grétar Snær detta úr liðinu. Þess má einnig geta að Arnór Borg er ekki í hóp.

Dómarateymið Jóhann Ingi Jónsson sér um það að dæma þennan leik en honum til halds og trausts verða þeir Jóhann Gunnar Guðmundsson og Andri Vigfússon. Einar Örn Daníelsson er eftirlitsmaður KSÍ á meðan Gunnar Oddur Hafliðason verður varadómari.

Liðin hafa mæst tvisvar á tímabilinu Þetta verður þriðja viðureign Breiðabliks og FH á tímabilinu en þau spiluðu auðvitað bikarleik ásamt því að hafa spilað í Kaplakrika í fyrri umferðinni.

Liðin gerðu einmitt 2-2 jafntefli í Kaplakrika í fyrri umferð Bestu deildarinnar. Davíð Snær gerði bæði mörk FH í þeim leik en Stefán Ingi og Viktor Karl skoruðu sitthvort markið fyrir Blika.

Í bikarleiknum unnu Blikarnir 3-1. Úlfur Björnsson kom FH yfir í fyrri hálfeik en Klæmint Olsen jafnaði þegar það voru u.þ.b. 20 mínútur eftir af leiknum. Davíð Ingvars skoraði þá í uppbótartíma til þess að koma Breiðablik yfir og Klæmint Olsen gulltryggði þá sigur Blika djúpt inni í uppbótartíma með sínu öðru marki í þeim leik.

Arnar Daníel spáir í spilin Arnar Daníel Aðalsteinsson, leikmaður Gróttu, spáir í leikina sem verða spilaðir í Bestu í dag. Svona lítur spáin hjá Arnari út. Hann var auðvitað hluti af U19 landsliðshópnum sem lék á Evrópumótinu á Möltu í sumar. En hann hefur þetta að segja um leikin sem við munum fylgjast með hér:

Breiðablik 3 - 1 FH (14:00 í dag)
Blikarnir svífa um á bleiku skýi eftir Evrópugeðveikina síðasta fimmtudag, Jassi verður í gír og skorar eitt, svo leggur hann upp eitt á Eyþór Wöhler. Davíð Ingvars mun svo drepa leikinn með því að krossa boltanum á fyrsta mann FH sem kiksar honum í eigið net. Kjartan Kári klórar í bakkann með sleggju fyrir utan teig.

Hvernig er þessi pakki? Við skulum taka stöðuna aðeins í deildinni og sjá hvernig þessi pakki frá 3. sæti og niður í 7. sæti lítur út:

3. Breiðablik - 38 stig - +10 í markatölu
4. Stjarnan - 31 stig - +17 í markatölu
5. FH - 31 stig - -5 í markatölu
6. KR - 31 stig - -7 í markatölu
-----------------------------------------
7. KA - 28 stig - -8 í markatölu

Heil umferð í Bestu! Þetta er seinasta umferð Bestu deildarinnar fyrir tvískiptinguna. Það verða 5 aðrir leikir í gangi á sama tíma. Við verðum auðvitað á öllum þessum leikjum en hér getur þú fylgst með gangi mála í þeim leikjum:

Stjarnan - Keflavík, Kári Snorrason textalýsir
ÍBV - KR, Tryggvi Guðmundsson textalýsir
Valur - HK, Hafliði Breiðfjörð textalýsir
Fylkir - KA, Kjartan Leifur Sigurðsson textalýsir
Fram - Víkingur R, Sverrir Örn Einarsson textalýsir

Mikið í húfi fyrir Hafnfirðingana í dag Það er auðvitað búið að fara vel yfir það hvað er í húfi fyrir lið eins og FH í dag. Þannig er mál með vexti að ef þeir tapa í dag og KA vinnur Fylki í Árbænum spilar FH í neðra umspilinu eftir tvískiptinguna. En þeir geta líka horft upp á við þar sem þetta blessaða 4. sæti gæti verið mögulegt evrópusæti og þeir eru jafnir á stigum og Stjarnan sem eru í því sæti en bara með verri markatölu. Verða FH-ingarnir í evrópubaráttu eftir tvískiptinguna eða spila þeir við liðin í neðri helmingnum?

Hvernig koma Blikarnir í þennan leik? Eins og líklega allir vita að þá voru Blikarnir að tryggja sér sæti í riðlakeppni Sambandsdeildarinnar. Fyrsta Íslenska liðið í sögunni. Margir hafa talað um hvernig Blikarnir koma inn í þennan leik. Það hefur auðvitað verið mikil pressa á þeim að klára þetta einvígi á móti FC Struga. Margir telja það líklegt að þeir komi inn í þennan leik bara léttir og fullir sjálfstrausts. Þeir hafa auðvitað þannig séð engu að tapa og það ætti ekki að vera mikil pressa á þeim núna. Þetta verður áhugavert.

Stórleikur í Bestu! Heilir og sælir áhorfendur góðir og veriði hjartanlega velkomin í þessa þráðbeinu textalýsingu frá Kópavogsvelli þar sem Breiðablik tekur á móti FH í Bestu deildinni.