SKÝRSLAN: Bikarævintýri á Vestfjörðum?
Hvað réði úrslitum?
Kraftmikil byrjun gestanna lagði grunninn að þessum sigri. Þrátt fyrir jöfnunarmark Aftureldingar voru Vestramenn beinskeyttari við markið og áttu sigurinn skilið.
Bestu leikmenn
1. Pétur Bjarnason
Pétur var frábær í dag. Sterkur og var að valda allskonar usla í vörn Aftureldingar. Skoraði gott mark og vann vel fyrir liðið.
2. Sergine Fall
Kraftmikill leikmaður sem var ansi duglegur upp hægri vænginn í dag. Skoraði mark eftir frábært samspil og skilaði heilt yfir góðri frammstöðu.
Atvikið
Seinna mark Vestra var hreint út sagt frábært. Langur bolti á Fall sem finnur Luke í fyrsta. Luke kassar boltann og setur hann svo blint aftur fyrir sig beint í hlaupaleiðina hjá Fall sem klárar með alvöru neglu. Aron Elí snerist í hringi þarna og leit ekki vel út.
Hvað þýða úrslitin?
Ósköp einfalt. Aftureldingar er úr leik í ár en Vestri verður í pottinum í næstu umferð Mjólkurbikarsins.
Vondur dagur
Kraftleysi heimamanna stóran hluta leiks er áhyggjuefni. Það er langt síðan liðið vann leik og þetta hefði geta verið góð vítamínsprauta fyrir liðið að fara áfram í bikar. Liðið er vel spilandi og hættulegt á köflum en þarf á sigurtilfinningunni að halda.
Dómarinn - 8
Einar Ingi hafði frábæra stjórn á þessum leik og klikkaði ekki á neinu stóru atriði.