Þáttöku KR lokið í Evrópu þetta árið þrátt fyrir sigur á Pogon í dag. EN þessi sigur skilar stigum sem færa okkur nær því að endurheimta fjórða Evrópusætið og er Íslenskum fótbolta til sóma. Ljóst var að verkefnið var erfitt en KRingar geta gengið stoltir frá borði með þennan sigur í bókinni.

Almqvist kemst í boltann í teignum en Beitir mættur á móti og fær boltann í sig. Vissi minnst um það sjálfur Beitir en vel gert fyrir því.

Aron Þórður með kraftlítið skot af 20 metrum sem Dante á ekki í vandræðum með. Uppbótartími er að minnsta kosti fjórar mínútur.

Aron Kristófer með skot af talsverðu færi en beint í fang Stipica

Kamil Grosicki með stórhættulegan bolta fyrir markið frá vinstri. Nafni hans Drygas örlítið of seinn og boltinn afturfyrir.

Boltinn fyrir mark Pogon frá vinstri en Stipica hirðir boltann.

Klaufagangur í öftustu línu, Jean Carlos leggur boltann fyrir markið þar sem mér sýnist það vera Vahan Bichakhchyan sem á skotið, Beitir ver en boltinn við það að leka yfir línuna þegar Kennie mætir og hreinsar í horn.

Kamil Grosicki fær að fara ansi nálægt markinu í teig KR og leggja boltann fyrir markið. Aron Kristófer kemur sér á endanum fyrir og hreinsar í horn.

Heimamenn stálheppnir. Pontus fær boltann klaufalega í hendina sem aftasti maður en Írinn er ekkert að hafa áhyggjur af því. Líklega ekki séð þetta þó augljóst væri.

Luka Zahovic í hættulegu færi í teig KR en skóflar boltanum yfir markið.

Luis Mata í góðri stöðu í teignum en á ömurlega fyrirgjöf beint í fang Beitis.

Góð sókn KR. Kennie og Atli líkt og oft áður að leika vel sín á milli. Fyrirgjöf Kennie berst út í teiginn þar sem Atli nær skotinu en boltinn framhjá markinu.

Rólegt yfir leiknum þessa stundina. Gestirnir varfærnir og ekki á jafn háu tempói og í fyrri leiknum.

Pontus með frábæra varnartilburði og bjargar nánast öruggu marki þegar hann hendir sér fyrir skot í teignum eftir snögga sókn gestanna.

Damian Dabrowski með skotið en beint á Beiti

Seinni hálfleikur hafinn KRingar hefja þennan síðari hálfleik. Þurfa tvö mörk enn til að koma sér í framlengingu sem og að halda hreinu að sjálfsögðu. Fjögurra marka sigur tryggir áframhald.

Flautað til hálfleiks hér í Vesturbæ. Heimamenn leiða eftir rislítinn fyrri hálfleik en okkur er nokk sama um það. Væri gaman að sjá KR setja annað mark snemma í síðari hálfleik og hleypa mögulega smá spennu í þetta.

+1 Atli með stórhættulegan bolta fyrir marki Pogon en Stefán og Sigurður ekki nægjanlega vakandi og ekkert verður úr.

+1 Uppbótartími er að minnsta kosti 2 mínútur

Jean Carlos með sprett upp hægri vænginn og setur boltann fyrir en Zahovic ekki á tánum og boltinn afturfyrir.

Fín sókn KR. Kennie með fyrirgjöf frá hægri sem skapar smá klafs. Boltinn berst aftur útfyrir teiginn þar sem Kennie lætur vaða með vinstri en boltinn vel yfir markið.

Atli fer vel með boltann úti til hægri, kemur boltanum inn á teiginn en finnur ekki samherja og boltinn afturfyrir.

Það er voðalega lítið um að vera í þessu. Gestirnir með gott forskot eftir fyrri leikinn og eru lítið að stressa sig.

Fátt hægt að segja um leikinn þessa stundina. Pogon ögn meira með boltann en hvorugt liðið að skapa sér neitt að ráði.

Kamil Grosicki að valda usla í vörn KR en nær ekki að koma boltanum á markið. Skapast alltaf hætta þegar hann fær að keyra á vörnina.

Álitleg sókn KR, Kennie og Atli leika sín á milli en varnarmenn komast fyrir og setja boltann út fyrir hliðarlínu.

Hornið tekið stutt á Theodór Elmar sem er eitthvað óákveðinn en setur boltann á endanum fyrir markið þar sem Dante Stipica handsamar boltann næsta örugglega.

KR vinnur horn eftir fínt hlaup frá Sigurði Bjarti.

Jean Carlos liggur á vellinum eftir samstuð við Pontus. Þarf aðhlynningu. Virðist hafa misst andan við höggið frá Pontus en er mættur á fætur.

Þetta er farið af stað á Meistaravöllum. Það eru gestirnir sem hefja hér leik.

Einhverjir stuðningsmenn Pogon gerðu sér glaðan dag í miðborg Reykjavíkur í dag. Vefur Morgunblaðsins fjallar meðal annars um að fjöldi lögreglumanna hafi mætt við stjórnarráðið og fylgt þeim eftir og gætt þess að þeir færu ekki inn á EM-torgið þar sem fólk fylgdist með leik Íslands og Ítalíu. Þeir eru væntanlega mættir á Meistaravelli og munu syngja þar.

Meira um dómarann Okkar allra besti Maggi Bö kom með skemmtilega staðreynd um Norður-Írann sem er fjórði dómari í dag. Thomas Anthony Clarke er grasvallarfræðingur að mennt og sparaði ekki hrósið á völlinn hans Magga og sagði hann grasið talsvert betra en á Windsor Park sjálfum þjóðarleikvangi Norður-Íra Ekki leiðinlegt hrós að fá frá öðrum fagmanni í bransanum. Viss um að Maggi og Andrew gætu tekið langt spjall um sín fræði og haft gaman að.

Byrjunarlið KR Liðin eru mætt í hús hér. Rúnar Kristinsson gerir tvær breytingar frá liðinu sem lék fyrri leikinn. Pálmi Rafn Pálmason og Kjartan Henry Finnbogason fá sér sæti á bekknum fyrir þá Sigurð Bjart Hallsson og Stefan Alexander Ljubicic. Þá er einnig ánægjulegt fyrir KR að sjá að Kristján Flóki Finnbogason er á varamannabekk KR í kvöld en hann er að stíga upp úr meiðslum eftir að hafa fótbrotnað í vor. Hvað gestina varðar sýnist mér þetta í fljótu bragði vera sama byrjunarlið og hóf fyrri leikinn í Póllandi.

Dómarinn Andrew Davey frá Norður Írlandi sér um dómgæslu á vellinum í dag. Georgios Argyropoulos og Ryan Kelsey eru honum til aðstoðar og fjórði dómari er Thomas Anthony Clarke.

Á KR möguleika? Miði er alltaf möguleiki en KR liðið þarf að eiga besta leik sem íslenskt hefur átt í Evrópu til þess að snúa taflinu við. Það má þó alltaf vera bjartsýnn og trúa á óvænt kraftaverk þar sem KR liðið hefur engu að tapa. Fari svo að KR eigi einhverja þá ótrúlegustu endurkomu knattspyrnusögunar hér á Íslandi bíður lið Bröndby í næstu umferð.

Fyrri leikurinn KR liðið sá aldrei til sólar í fyrri hálfleik gegn þeim pólsku í fyrri leik liðanna í Szczecin. Heimamenn komust yfir snemma leiks og lágu þungt á liði KR í fyrri hálfleik sem þurfti að gera sér að góðu að fara þremur mörkum undir inn í hálfleikinn. Síðari hálfleikur var betri hjá KR sem fékk þó á sig fjórða markið í leiknum áður en að Aron Kristófer Lárusson náði að minnka munin í 4-1 á 71. mínútu leiksins en það urðu lokatölur.

Velkomin til leiks Heil og sæl kæru lesendur og verið hjartanlega velkomin i beina textalýsingu Fótbolta.net frá Meistaravöllum þar sem fram fer seinni leikur KR og Pogon Szczecin í forkeppni Sambandsdeildar Evrópu