SKÝRSLAN: Eitursvalur Hallgrímur tryggði KA sigur
Hvað réði úrslitum?
Það er ofboðslega stutt á milli í þessu. Andartökum áður en að Damir tekur Ásgeir niður þá er Viktor Karl í dauðafæri hinu megin. Leikirnir gegn Víkingum og FH gátu ekki dottið verr fyrir KA menn, en lukkan var þeirra megin. Gríðarleg seigla í heimamönnum gegn afar vel spilandi Blikum.
Bestu leikmenn
1. Hallgrímur Mar Steingrímsson (KA)
Sívinnandi, opnaði mikið fyrir liðsfélaga sína og hefði með smá heppni getað skorað fleiri mörk en eitt. Algjörlega ískaldur á vítapunktinum.
2. Ívar Örn Árnason (KA)
Gekk mögulega skrefi of langt í áræðninni þegar að hann átti eitthvað vantalað við stöngina. En að öllu gamni slepptu, þá steig hann vart feilspor í leiknum og spilaði frábæran leik í hjarta varnarinnar.
Atvikið
Vítaspyrnudómurinn og vítaspyrnan. Skil ekki af hverju Viktor Örn sá ástæðu til þess að rennitækla, en þetta virtist alveg 100% víti. Eftirleikurinn er langt því frá auðveldur, en Hallgrímur hélt ró sinni og setti boltann eitursvalur í mitt markið.
Hvað þýða úrslitin?
Breiðablik er nú með sex stiga forskot á Víking R. sem að er í 2. sætinu. Blikar eru áfram með 48 stig. KA menn eru svo 8 stigum á eftir toppliðinu, en eru aftur á móti líka 8 stigum á undan Völsurum sem að töpuðu óvænt fyrir Leikni R. Nú er lokaumferðin í hefðbundinni deildarkeppni framundan, en þar mætast einmitt KA og Valur. Blikar eiga heimaleik gegn ÍBV.
Vondur dagur
Ísak Snær Þorvaldsson mun eiga talsvert betri leiki en hann gerði í dag. Byrjaði sprækur, en fannst hann einhvernveginn fjara út eftir því sem að á leikinn leið. Sóknarmaðurinn magnaði er á eftir markakóngstitlinum og fær fjölmörg tækifæri til þess að færa sig nær Nökkva.
Dómarinn - 8
Fannst hann komast vel frá sínu. Dæmdi ekki að óþörfu og var með stóru ákvarðanirnar réttar.