SKÝRSLAN: Eyjamenn komu tvisvar til baka í Eyjum
Hvað réði úrslitum?
ÍBV voru heilt yfir sterkari aðilinn í fyrri hálfleiknum, voru yfir í baráttunni og fengu fullt af tækifærum til að skora mörk. Voru klaufar að vera ekki í betri stöðu í hálfleik. Seinni hálfleikur var jafnari og einkenndist af mikilli baráttu og færri marktækifærum. Fram komst yfir á 64. mínútu og virtust ætla að sigla sigrinum heim en ÍBV liðið sýndi karakter og komu til baka á 82. mínútu. Bæði lið svekkt en heilt yfir nokkuð sanngjörn úrslit.
Bestu leikmenn
1. Telmo Castanheira (ÍBV)
Var flottur á miðjunni í dag og var að dreifa boltanum vel út á vængina og finna opnanir. Skoraði svo jöfnunarmarkið á 82. mínútu og bjargaði stigi fyrir ÍBV. Stig sem gæti verið dýrmætt þegar uppi er staðið.
2. Guðmundur Magnússon (Fram)
Skoraði bæði mörk Fram í dag, kom þeim yfir í fyrri hálfleik svolítið gegn gangi leiksins. Gerði svo geggjað mark í seinni hálfleik af miðjum vallarhelmingi Eyjamanna. Elskar að skora á móti ÍBV. Dró aðeins af honum eftir seinna markið og fór af velli á 83. mínútu.
Atvikið
Jöfnunarmark ÍBV á 82. mínútu. Voru ekki búnir að vera mjög líklegir til að jafna. Frammarar voru brjálaðir og vildu fá aukaspyrnu í aðdragandanum.
Hvað þýða úrslitin?
ÍBV er áfram í 9. sætinu og fer í 20 stig, stigi á undan FH og þremur stigum á undan Leikni. Þeir mæta Breiðablik í næstu umferð áður en úrslitakeppnin hefst og þar verða þeir í neðri hlutanum. Fram er í 7. sætinu með 25 stig eins og Keflavík, þremur stigum á eftir Stjörnunni. Fram tekur á móti Keflavík næst og er enn í séns að komast upp fyrir Stjörnuna og fara þar með í efri hluta úrslitakeppninnar.
Vondur dagur
Þrátt fyrir að það hafi verið jafnt í hálfleik þá var Fram liðið undir í baráttunni á flestum sviðum vallarins og voru í raun heppnir að ÍBV nýtti ekki eitthvað af þeim fjölda tækifæra sem þeir fengu. Að sama skapi lélegt hjá ÍBV að nýta það ekki. Andri Rúnar hefur verið líflegri í ÍBV liðinu og fékk fín færi til að skora.
Dómarinn - 6.5
Heilt yfir alveg fínt en samt svolítið ósamræmi í brotum og spjöldum í gegnum allan leikinn. Þarf að sjá jöfnunarmark ÍBV í lokin þar sem Frammarar vildu aukaspyrnu. Sá það ekki nógu vel úr blaðamannastúkunni.