Víkingar nýttu sín færi en Keflvíkingar ekki svo einfalt er það. Gestirnir úr Fossvogi voru ákveðnir fyrir framan markið í fyrri hálfleik og refsuðu Keflvíkingum fyrir þau mistök sem þeir gerðu. Seinni hálfleikurinn náði síðan aldrei flugi þegar Víkingar sátu til baka og lokuðu á flest allt það sem Keflvíkingar reyndu að framkvæma og úrslitin því sanngjörn.

Vítaspyrnudómurinn var augnablik leiksins eftir að að Keflvíkingar höfðu skorað mark sem dæmt var af beint úr hornspyrnu. Keflvíkingar höfðu mínúturnar á undan náð að setja Víkinga undir aukna pressu en þegar Helgi skilaði boltanum í netið úr spyrnunni færðist aukin ró í leik Víkinga sem virtust aldrei líklegir til að missa sigurinn úr greipum sér.

Víkingar minnka forskot Blika í toppsætinu niður í sex stig og minntu þar með á sig. Keflvíkingar misstu af gullnu tækifæri til að koma sér í topp sex og þurfa nú að treysta á sigur í síðustu umferðinni auk þess að treysta á að Stjarnan tapi sínum leik.

Miðja Keflavíkur réði illa við Víkinga framan af leik í dag sem léku af skynsemi í dag. Gekk betur í síðari hálfleik en skaðinn var skeður og tókst gestunum að núlla út flest það sem Keflavík hafði fram að færa.

Var mark Keflavíkur beint úr horni löglegt? Ég hef ekki séð endursýningar en horfandi inn á völlinn fannst mér leikmenn Keflavíkur ekki mótmæla dómnum af neinni sannfæringu. Vafaatriði þó sem þarf að taka tillit til og skoða betur áður en dómur fellur hvað það varðar. Vítaspyrnudómurinn þegar Helgi er tekinn niður er réttur frá mér séð og fátt sem ég get bætt við um hann. Keflvíkingar gerðu svo tilkall til og báðu um vítaspyrnu þegar boltinn á að hafa farið í hönd Víkings innan teigs. Sá ekki atvikið sem slíkt enda erfitt að horfa í gegnum leikmenn en tríóið virtist visst í sinni sök þar. Með þessi atvik frá fannst mér Jóhann hafa ágæt tök á leiknum og skila sínu nokkuð vel frá sér. Set þó þann fyrirvara á einkunn hans að þau tvö atvik sem ég get ekki dæmt um séu rétt. Séu þau það ekki lækkar einkunn að sjálfsögðu í samræmi við það.