SKÝRSLAN: Hnoð Valsmanna sendi þá tómhenta úr Breiðholtinu
Hvað réði úrslitum?
Valsmenn reyndu hvað eftir annað að hnoðast í gegnum vel skipulagðan varnarleik Leiknismanna sem voru ótrúlega duglegir og börðust með kjafti og klóm lengi vel manni færri. Valur er mikið betra fótboltalið en Leiknir en ef þú leggur ekki líf og sál í verkefnið þá á það til að gerast að þú uppskerð eins og þú sáir. Það virkaði ekkert að reyna að hnoðast í gegnum vörnina eða skjóta aumum skotum sem var auðvelt að grípa. Leiknismenn gripu svo gæsina og hrifsuðu leikinn til sín með góðu marki seint í leiknum og jú líka með því að leggja líf og sál í verkefnið!
Bestu leikmenn
1. Viktor Freyr Sigurðsson (Leiknir)
Viktor Freyr stóð vaktina í marki Leiknis vel í dag. Hann þurfti sjaldan að hafa mikið fyrir því að verja aum skot Valsmanna en gerði ótrúlega vel þegar hann varði skalla Patrick Pedersen af stuttu færi seint í leiknum.
2. Davíð Júlían Jónsson (Leiknir)
Davíð var að spila sinn fyrsta leik í byrjunarliði og var ótrúlega flottur í liði Leiknis. Spilaði án þess að stressast upp og eins og hann hafi aldrei gert neitt annað. Átti stoðsendinguna í sigurmarkinu.
Atvikið
Það voru 9 mínútur eftir af venjulegum leiktíma þegar Leiknir brá sér í sjaldséða sókn, eftir undirbúning frá Kristófer Konráðssyni barst boltinn á Davíð Júlían í teignum sem lagði hann til hliðar á Birgi Baldvinsson sem skoraði sigurmarkið í leiknum. Þetta atvik réði úrslitum í dag.
Hvað þýða úrslitin?
Ég hélt að Leiknir væri búið að stimpla sig út úr Bestu-deildinni eftir 9-0 tapið gegn Víkingi í síðustu umferð og menn vildu bara klára mótið með árarnar í bátnum. Það er svo aldeilis ekki því eftir svona leik fara þeir upp úr botnsætinu og í það næst neðsta. Framundan er svo risaleikur við botnlið ÍA í næstu umferð og svo fimm umferðir af leikjum við lið úr neðri hlutanum. Svokallaðir úrslitaleikir. Valur horfði upp á KA vinna sinn leik í dag og eru orðnir 8 stigum frá þriðja sætinu sem gæti gefið Evrópusæti þetta árið. Von um að ná því sæti fjarlægðist mikið í dag.
Vondur dagur
Zean Dalügge gerði heiðarlega til raun til að eyðileggja daginn fyrir liðsfélögum sínum í Leikni í dag þegar hann ákvað að fara á glórulausan hátt með takkana í lærið á Sigurði Agli út við hliðarlínu í kjölfar innkasts. Augljóst rautt spjald og fyllilega verðskuldað. Þegar maður horfir á svona brot hugsar maður hvort hann hafi virkilega ekki nennt að vera á vellinum. Ef svo er þá hefði líklega verið betur heima setið en að gefa kost á sér.
Dómarinn - 8
Helgi Mikael þurfti ekki að hafa mikið fyrir hlutunum í dag en hafði allt á hreinu. Hann hafði á réttu að standa í stóru ákvörðuninni, rauða spjaldinu á Zean Dalügge.