SKÝRSLAN: Þróttur sótti sigur í uppbótartíma
Hvað réði úrslitum?
Þetta hefði í rauninni alveg getað dottið öðrum hvorum megin í lokinn en Þróttarar höfðu smá heppni með sér og náðu að klára þetta. Þær voru samt klárlega búnar að vinna fyrir heppninni af því að ef að heilt yfir voru þær betra liðið í leiknum og áttu stigin þrjú skilið.
Bestu leikmenn
1. Katherine Amanda Cousins
Þvílík vél sem þessi leikmaður er. Hún spilaði eins og herforingi á miðjunni og dró Þróttara liði áfram. Hún vann langflest einvígi og svo er bara svo mikið skemmtanagildi sem fylgir því að horfa á hana spila bolta. Alvöru spilari!
2. Freyja Karín Þorvarðardóttir
Set hana aðallega hérna vegna þess að hún skoraði sigurmarkið en málið er að það var nákvæmlega þess vegna sem hún kom inná, til þess að skora fótboltamark. Ef að Þróttur hefði ekki stolið þessu í lokinn hefði ég sett Melissu í markinu hjá Þór/KA hingað. Hún átti nokkrar góðar vörslur og hélt Norðankonum inn í leiknum alveg til enda.
Atvikið
Sigurmarkið! Þróttarar voru búnar að fá heilan helling af hornspyrnum í leiknum en þær voru einhvernveginn aldrei líklegar til árangurs þangað til að þær náðu loksins að nýta eina slíka og það í uppbótartíma.
Hvað þýða úrslitin?
Þróttarar fara í 10 stig og fara í 2. sæti deildarinnar. Þær eru með jafnmörg stig og Valur en Valsarar taka fyrsta sætið á markatölu. Þór/KA fer svo úr fyrsta sætinu í það þriðja. Umferðin klárast svo á morgun og þá vitum við nákvæmlega hvar liðin standa eftir þessa umferð.
Vondur dagur
Færanýting í fyrri hálfleik var alls ekki neitt til þess að monta sig af. Hvorugt liðið nýtti færin sín en það voru sérstaklega Þróttarar sem voru að fara illa með sín færi, sem vöru töluvert fleiri en norðankonur fengu.
Dómarinn - 7
Mér fannst Aðalbjörn dæma þetta ágætlega í dag. Hann hefði alveg mátt lyfta fleiri gulum spjöldum að mínu mati en það er nú ekkert stórmál. Það er samt spurning hvort að markið sem var dæmt af Þór/KA í fyrri hálfleik hafi verið löglegt en það voru skiptar skoðanir um það hvort að Hulda hafi verið fyrir innan eða ekki. Lítið hægt að kenna Aðalbirni um það svo sem þar sem hann verður að treysta á sinn mann, Sigga Schram, á línunni en það hefði svo sannarlega getað breytt leiknum ef markið hefði fengið að standa.