SKÝRSLAN: Liðin deila stigunum í fjörugum leik á Hlíðarenda
Hvað réði úrslitum?
Færanýtingin varð báðum liðum að falli í dag, leikurinn hefði hæglega getað endað 4-4 og fara bæði lið súr af velli með einungis eitt stig.
Bestu leikmenn
1. Björn Daníel Sverrisson (FH)
Björn Daníel var frábær í liði FH, skoraði fyrsta markið og var skapandi sóknarlega ásamt því að vera sterkur og duglegur varnarlega.
2. Kjartan Kári Halldórsson (FH)
Kjartan Kári var virkilega líflegur og hættulegur meðan hann var inná vellinum, skapaði mikið af sénsum og átti góðar spyrnur í föstum leikatriðum ásamt því að verjast virkilega vel gegn Birki Má.
Atvikið
Markvarsla Sindra Kristins fyrir utan teig þegar Birkir Már slapp í gegn, þar átti hann að fjúka útaf og FH þar með að verða manni færri, það hefði klárlega haft stór áhrif á leikinn.
Hvað þýða úrslitin?
Valur er í 3. sæti með 15 stig, 6 stigum á eftir Víkingum meðan FH-ingar fylgja þeim fast á hæla með 13 stig í 4. sætinu.
Vondur dagur
Skrýtið að segja það eftir stórkostlega stoðsendingu en með betra slútti í bara einu af þremur dauðafærum hefði Sigurður Bjartur skilað FH sigri hér í kvöld, það er með ólíkindum að hann hafi ekki skorað í þessum leik.
Dómarinn - 3
Virkilega stór mistök eftir rúmlega korters leik að Sindri Kristinn fái ekki rautt spjald, svo breyttist lína dómarans algjörlega í hálfleik, mér fannst allt fyrir utan stóru mistökin flott í fyrri hálfleik, en í seinni breyttist þetta í flaututónleika og öll harka og barátta sem var til staðar í fyrri hálfleik var þurrkuð út úr leiknum ásamt flæðinu sem dó með.