Liðin eru að ganga út á völl Þetta er að bresta á!

Rigning Það er ansi blautt í veðri. Náttúran búin að bleyta vel í vellinum, það er athyglisverður leikur framundan.

Byrjunarliðin Þór/KA tapaði í mikilli dramatík á heimavelli gegn Val á dögunum en Jóhann Kristinn Gunnarsson gerir þrjár breytingar á liðinu frá þeim leik. Shelby Money er komin aftur í markið á kostnað Hörpu Jóhannsdóttur.

Þá eru Bríet Jóhannsdóttir og Hildur Anna Birgisdóttir ekki í leikmannahópnum en Karen María Sigurgeirsdóttir og Bryndís Eiríksdóttir koma inn í þeirra stað.

Það eru tvær breytingar á liði Blika sem vann Keflavík í Bestu deildinni á dögunum. Vigdís Lilja Kristjánsdóttir og Karitas Tómasdóttir koma inn í liðið fyrir Hrafnhildi Ásu Halldórsdóttir og Írenu Héðinsdóttir Gonzalez sem setjast á bekkinn.

Dómarateymið Gunnar Oddur Hafliðason verður með flautuna hér í kvöld. Patrik Freyr Guðmundsson og Sigurjón Þór Vignisson verða honum til aðstoðar. Snorri Eldjárn Hauksson er fjórði dómari og Halldór Breiðfjörð Jóhannsson er eftirlitsmaður KSÍ.

Óskar Smári spáir dramatík Óskar Smári Haraldsson, þjálfari Fram, spáir dramatískum sigri Blika eftir framlengingu.

Þór/KA 1 - 2 Breiðablik
Hörkuleikur þar sem úrslit munu ráðast í lok framlengingar. Blikar með boltann en agaður og góður varnarleikur norðanstúlkna verður öflugur. Sandra María kemur Þór/KA yfir, en sjóðheit Katrín Ásbjörns mun halda áfram að skora og jafnar leikinn. Heiða Ragney mun síðan skora sigurmarkið í uppbótartíma framlengingar með hörkuskalla.

Fyrri viðureign sumarsins Þór/KA og Breiðablik mættust í deildinni fyrir 20 dögum síðan hér á Akureyri þar sem gestirnir höfðu betur 3-0. Sex stig skilur liðin að í deildinni en Blikar eru á toppnum. Þór/KA hefur tapað þremur leikjum, öllum gegn Blikum og Val.
Vigdís Lilja skoraði eitt af mörkum liðsins

Leið liðanna í undanúrslitin Þetta er fyrsti heimaleikur Þór/KA í bikarnum en liðið lagði Tindastól í grannaslag á Dalvíkurvelli í fyrstu umferð 2-1 eftir að hafa lent undir skoruðu Karen María Sigurgeirsdóttir og Hulda Ósk Jónsdóttir en öll mörkin komu í fyrri hálfleik. Næst heimsótti liðið FH og vann 1-0 þar sem Sandra María Jessen kom inn á í hálfleik og skoraði strax og tryggði liðinu sigur.

Breiðablik vann Stjörnuna í ótrúlegum leik þar sem leikar enduðu 4-3 í Garðabænum. Agla María Albertsdóttir skoraði tvö mörk, það seinna úr umdeildri vítaspyrnu í framlengingu og fékk síðan rautt spjald. Þá fór liðið illa með Keflavík á Kópavogsvelli en lokatölur urðu 5-2 þar sem Katrín Ásbjörnsdóttir skoraði tvö mörk.

Agla María Albertsdóttir

Risa leikur framundan Góða kvöldið. Verið velkomin í beina textalýsingu frá leik Þórs/KA og Breiðabliks í undanúrslitum Mjólkurbikars kvenna. Leikurinn fer fram á VÍS vellinum á Akureyri. Mikið ósætti er með leiktímann fyrir norðan.

   26.06.2024 14:58

Þurfa að spila á föstudag vegna frjálsíþróttamóts - „Beinlínis hættulegt"