SKÝRSLAN: Líf og fjör á Greifavellinum - og tvöfalt lokaflaut
Hvað réði úrslitum?
Jafntefli var sanngjörn niðurstaða, þegar á hólminn er komið. En þetta hefði hæglega getað verið 4-4 leikur frekar en 1-1. Hetjulegar bjarganir varnarmanna, mislagðir fætur sóknarmanna og flottar markvörslur komu í veg fyrir markaveislu.
Bestu leikmenn
1. Steinþór Már Auðunsson (KA)
Var frábær í dag. Öruggur í öllum sínum úthlaupum, greip vel inn í og átti bara heilt yfir glimrandi góðan leik.
2. Daníel Laxdal (Stjarnan)
Stýrði vörn Stjörnunnar vel og nýtti alla sína reynslu. Afar öflugur í loftinu þar sem að tímasetningar hans eru yfirleitt uppá 10.
Atvikið
Fyrra lokaflaut Ívars Orra Kristjánssonar var vægast sagt athyglisvert augnablik. Að lágmarki var uppbótartíminn 4 mínútur, en þegar klukkan var sirka 93:30 flautaði Ívar leikinn af og það var eins og hver einasti einstaklingur í grennd við völlinn og inná honum væri ringlaður. Enda tók hann flautið til baka - eitthvað sem að ég hef aldrei séð áður og við fengum dauðafæri Daníels í kjölfarið.
Hvað þýða úrslitin?
KA situr í 8. sæti Bestu-deildarinnar með 24 stig, en Stjarnan er sæti ofar með 25 stig. KA mætir Fram á útivelli í næstu umferð, en Framarar eiga leik til góða á þessi lið og eru í 6. sæti með 26 stig. Stjarnan mætir HK á Samsungvellinum í næstu umferð.
Vondur dagur
Það er erfitt að henda þessum stimpli á einhvern í þessum ágæta leik. Ætli undirritaður sé ekki fyrst og fremst bara svekktur yfir því að hafa ekki fengið fleiri mörk í leikinn, þar sem að færin sem að boðið var uppá hefðu sannarlega getað endað með betri uppskeru.
Dómarinn - 7
Bara fínn leikur í dag hjá Ívari, þó að þetta lokaflaut hafi verið smá heilafrost.