SKÝRSLAN: HK vinna ekki á útivelli
Hvað réði úrslitum?
Leiknismenn voru ofboðslega klínískir í dag og refsuðu gestunum fyrir mistökin sem þeir gerðu og leikurinn var svo gott sem búinn í hálfleik. HK komu betri út í seinni hálfleikinn en það var bara of seint og sigur Leiknis sanngjarn á endanum.
Bestu leikmenn
1. Shkelzen Veseli (Leiknir R.)
Þvílíkur leikmaður sem Shkelzen Veseli er. Oftar en ekki þar sem hann er besti maður vallarins þegar ég horfi á Leikni spila. Ofboðslega lunkinn með boltann með frábæran vinstri fót. Skorar tvö og á hokkí stoðsendingu með aukaspyrnunni sinni í marki númer 2.
2. Ólafur Íshólm Ólafsson (Leiknir R.)
Margir úr Leiknis liðinu sem hefðu getað verið í þessum dálki í dag en ég læt Ólaf Íshólm fá þetta. Ofboðslega traustur í rammanum og greinilegt að varnarlínunni líður vel með hann á bak við sig. Varði nokkrum sinnum vel og greip einnig vel inn í köflum. Fékk á sig eitt mark vissulega en við fyrstu sýn leit ekki út fyrir að hann gæti mikið gert í því. Marko og Djorde voru nálægt þessum dálki líka, þvílíkt hjarta sem þeir sýndu í hjarta varnarinnar.
Atvikið
Fyrsta markið sem Leiknismenn skora er alveg ofboðslega klaufalegt og setti í rauninni tóninn fyrir fyrri hálfleikinn. Ólafur Örn kominn langt út úr markinu hjá HK, missir boltann og Leiknismenn skora í opið markið. Fyrsta gjöfin af tveimur í fyrri hálfleik og kom Leikni á bragðið.
Hvað þýða úrslitin?
HK halda áfram að tapa á útivelli og eru búnir að fá á sig 11 mörk í þremur útileikjum á meðan Leiknismenn sigra sinn fyrsta heimaleik. HK eru með sín 12 stig í þriðja sæti á meðan Leiknir fara upp í níu stig og þar af leiðandi upp í sjöunda sæti.
Vondur dagur
Samvinna markvarðar og varnarmanna hjá HK fær þetta í dag. Það væri auðvelt að fleygja bara Ólafi Erni undir rútuna en mér fannst varnarmenn HK einnig eiga sök, þá allavega í marki þrjú sem var jólagjöf frá Kórnum til Breiðholtsins. Varnarmönnum líður ekki nóg og vel með Óla fyrir aftan sig sem virðist auka stress Óla á sama tíma
Dómarinn - 7
Mér fannst Gunnar Freyr bara fínn í dag. Var heldur spjaldaglaður á köflum en hann má eiga það að hann setti línu í upphafi leiks og hélt sig við hana. Beitti hagnaði oft vel sem er kostur sem ég kann að meta í fari dómara og lét menn ekki komast upp með neina vitleysu þegar kom að því að rífa kjaft.