SKÝRSLAN: Sanngjarn sigur en dómarinn reyndist örlagaríkur
Hvað réði úrslitum?
Mistök dómarans höfðu mikil áhrif á úrslitum en ég kem að því nánar í dómaradálkinum hér fyrir neðan. KR-ingar voru heilt yfir betra liðið og þá sérstaklega í fyrri hálfleik. Þá einfaldlega léku þeir sér að KA-mönnum. Gestirnir sýndu svo flottan karakter í að koma til baka í seinni og gera þetta spennandi en það reyndist ekki nóg.
Bestu leikmenn
1. Luke Rae (KR)
Hann er svo fljótur og svo iðinn enski kantmaðurinn. Varnarmenn og markmenn þurfa alltaf að vera að passa sig að hann sé ekki að koma á þig að stela boltanum eða að sleppa í gegn. Frábær í dag og skoraði flottasta mark leiksins, sem er ágætt því þau voru frekar flott í þessum leik. Svo var hann einnig með stoðsendingu
2. Aron Sigurðsson (KR)
Tvö mörk og býr til færið sem endar í markinu hans Luke Rae. Ekkert hægt að segja um þennan leikmann sem ekki hefur verið sagt áður, einfaldlega frábær. Hins vegar ef KA hefði jafnað leikinn hefði þessi dálkur verið tileinkaður Markúsi Mána Péturssyni sem var frábær í seinni hálfleik. Hann fær þó allavega þessa línu frá mér.
Atvikið
Það var heldur betur nóg af atvikum en þriðja mark KA manna hefur líkast til hækkað púlsinn hjá flestum hvað mest. Markið kom einni mínútu eftir að KA minnkaði muninn í 4-2 og á einu augabragði hafði þetta verið leikur sem var rosalega öruggur sigur KR-inga í að verða frekar jafn.
Hvað þýða úrslitin?
KR-ingarnir eru búnir að spila 10 leiki í deildinni og eru með 25 stig. Sitja í öðru sæti núna þegar við förum inn í landsleikjahlé. KA menn hins vegar eru enn bara með 10 stig en þó í 9 leikjum. Þeir eru í 8. sæti eins og er.
Vondur dagur
Fyrri hálfleikurinn hjá KA var algjört. Þar er erfitt að velja bara einn, þeir verða eiginlega bara að deila þessu allir saman, leikmenn og þjálfarar. KR-ingar fengu endalaust af plássi til að athafna sig og það var nákvæmlega ekki neitt að frétta sóknarlega þegar KA vann boltann.
Dómarinn - 3
Arnar Þór Stefánsson átti því miður skelfilegan dag með flautuna. Stóru atvikin voru tvö og þau voru bæði röng hjá honum. Fyrra atvikið er þegar Finnur Tómas fær gult fyrir að brjóta á Oliver sem er að sleppa í gegn. Í fyrsta lagi var þetta einfaldlega ekki brot, þetta var bara stórkostleg tækling. En fyrst hann dæmir þá er hlægilegt að hann gefi honum ekki rautt því Oliver hefði verið sloppinn einn gegn markmanni. Seinna atvikið er í stöðunni 4-3 þegar KA átti að fá víti, brotið á Jakobi Snæ inn í teig. Þá var ýmislegt annað sem mér fannst skrítið í dómgæslunni. Sérstaklega hvað KR-ingar komust upp með að tefja framkvæmdir á aukaspyrnum hjá KA með því að standa fyrir spyrnumanninum. Arnar gerði ekkert í þessu og Hallgrímur þjálfari KA talaði um þetta í viðtali eftir leik.