Þokkaleg frammistaða að mörgu leyti í tapi gegn Japan. Sóknarlega var liðið þó ekki að gera mikið þó vörnin hafi staðið vel að mestu.

Logi með góðann bolta inn á teiginn sen Hayakawa kýlir frá, Boltinn fellur fyrir Hjört á 20 metrunum sem reynir skotið en boltinn framhjá.

Dagur Dan með aukaspyrnu inn á teig Japan sem siglir yfir allt og alla og endar í markspyrnu. Síðasti möguleikinn farinn þarna?

Japanir verjast, Ísland fær hornspyrnu. Sína fyrstu í leiknum. Ísak Snær með skot eftir hornið en Japanir koma boltanum frá.

Ísland fær aukaspyrnu á álitlegum stað.

Skal engan undra með allar þessar skiptingar og vatnspásu.

Af einhverjum ástæðum hefur Ísak ekki enn fengið að fara inná.

Einn leikmaður úr byrjunarliði Japan eftir inn á vellinum.

Logi reynir skot eftir snögga sókn Íslands en hittir ekki markið.

Hajime Moriyasu á í hörku samræðum við fjórða dómara leiksins sem þarf að hafa sig allan við að reyna róa manninn. Hvers vegna skil ég samt ekki.

Takefusa Kubo hleypur með boltann í gegnum allan teiginn áður en hann nær skoti, boltinn í varnarmann og Ísland hreinsar.

Hajime Moriyasu sem er afar snyrtilega klæddur er ekkert yfir sig ánægður með spilamennsku sinna manna í leiknum og lætur þá aðeins heyra það.

Mikael Egill liggur í teignum og heldur um andlit sitt. Fengið eitthvað högg á kjálkann þegar Japan tók hornið.

Aukaspyrna tekinn inn á teiginn og boltinn af Aroni Einari í átt að marki, Hákon ekki viss og slær boltann frá í horn.

Meira um Yuto Nagatomo. Margir muna eflaust eftir honum í búningi Inter Milan á árunum 2011 til 2018. Hann kunni afar vel við sig í Mílanó, svo mjög reyndar að hann bað konunnar sinnar japönsku leikkonunar Airi Taira á grasinu á San Siro. Eina merkta mynd má finna af Nagatomo í myndabanka Fótbolta.net.

Nakamura fer illa með góða stöðu. Kemst inn að teignum og velur að skjóta með Daníel Leó í andlitinu á sér. Samherji laus hinum megin í teignum en sem betur fer velur Nakamura lakari kostinn.

Koki Ogawa í fínu færi við vítateigslínuna en setur boltann framhjá markinu.

Logi með góðan bolta fyrir markið frá vinstri, Brynjólfur í góðri stöðu en nær að stýra skallanum á markið. Átti hreinlega að gera betur þarna.

Fær boltann í teignum eftir fasta sendingu frá Mikael Agli en setur boltann fram hjá úr prýðisgóðu færi.

Nagatomo með skot á lofti eftir fyrirgjöf frá hægri, nær litlum krafti í skotið og veldur Hákoni ekki vandræðum með því.

Hornspyrna til Japan eftir ágæta rispu hins 39 ára Yuto Nagatomo

Hornspyrnan tekinn frá vinstri yfir á fjærstöng þar sem Itakura nær til boltans. Nær fínu skoti en Hákon nær að slá boltann frá í hendina á Andra Fannari og afturfyrir. Japnir malda eitthvað í móin og vilja víti en Pólverjinn segir nei.

Japan sækir hornspyrnu.

Ísland hefur hér leik í síðari hálfleik.

Með bolta: Jap 57%-43% Ísl Skot: Jap 7-3 Ísl Sendingar: Jap 363-271 Ísl

Flautað til hálfleiks í Tókýó og staðan markalaus. Eftir hæga byrjun komst lið Íslands betur inn í leikinn en engin klár dauðafæri litið dagsins ljós.

Takehiro Tomiyasu með skot á lofti eftir góða sókn Japan, boltinn tiltölulega beint á Hákon sem heldur þó ekki boltanum en kastar sér á eftir honum og handsamar að lokum.

Skipting Yoshida og vatnspásan telja drjúgt.

Dagur Dan með lagleg tilþrif við D-bogann og nær fínu skoti sem Suzuki þarf að slá til hliðar.

Ao Tanaka með tilraun af einhverjum 30 metrum. Beint á Hákon.

Keito Nakamura með skalla að marki eftir fyrirgjöf frá hægri. Hákon slær boltann yfir markið. Fyrsta hornspyrna leiksins.

Takefusa með skot af löngu færi, Hákon með auðvelda vörslu.

Gísla Gottskálk langar rosalega í treyju Ritsu Doan leikmanns Frankfurt og gerir heiðarlega tilraun til að klæða hann úr henni. Sleppur með spjaldið.

59%-41% er Possession tölfræðin

Fínt spil Íslands upp völlinn endar meö hörkuskoti frá Loga Tómassyni, Boltinn því miður hárfínt fram hjá stönginni.

Hitinn í Tókýó er um 27 gráður og menn fá nú tækifæri til að vökva sig og fá eflaust skilaboð hjá þjálfurum sínum.

Gengið betur að halda boltanum síðustu mínútur, ekkert náð að skapa opnanir samt.

Japan verið 78% með boltann hér þessar fyrstu tæpu tuttugu mínútur.

Junya Ito með boltann úti til vinstri og reynir að finna samherja á stönginni fjær. Setur alltof mikið púður í fyrirgjöfina sem svífur hátt yfir teiginn og afturfyrir.

Maya Yoshida er að hætta að leika með landsliði Japan. Bæði lið stila sér upp og standa heiðursvörð fyrir hann er hann gengur af velli í sínum síðasta landsleik. Fallega gert og svo sannarlega vel við hæfi.

Aftur er Nakamura að ógna, boltinn fellur fyrir hann í teignum en skot hans af varnarmanni og út.

Japanir spila sig í gegnum vörn Íslands úti til vinstri. Keito Nakamura í þröngu færi við vinstra markteigshorn en setur boltann framhjá stönginni fjær.

Heimamenn haldið boltanum töluvert í upphafi en ekkert náð að ógna marki Íslands.

Fyrsta skotið er Íslands, tilraun af mjög löngu færi frá Degi Dan sem Zion í marki Japan á ekki í nokkrum vandræðum með.

Þetta er farið af stað í Tókýó, það eru heimamenn sem sparka þessu af stað.

Margir leikmenn Japans spila með gríðarsterkum liðum í Evrópu. Wataru Endo þekkja íslendingar vel sem Leikmann Liverpool en hann er síður en svo sá eini. Ao Tanaka er einnig á Englandi og leikur með Leeds. Markvörðurinn Suzuki spilar með Parma og Hioki Ito varnarmaðurinn sterki er leikmaður Bayern Munchen.

Vináttuleikur er þetta vissulega en þeir í Japan vilja gera hlutina á ögn meira "grand" hátt. Leikurinn hefur því að sjálfsögðu nafn. Kirin Challenge Cup er því undir í leiknum. Og já það er nánast örugglega bikar í boði fyrir sigurliðið.

Ísland hefur þrívegis mætt Japan áður á knattspyrnuvellinum. Fyrsti leikurinn á milli þessara þjóða var leikinn á Laugardalsvelli árið 1971. Þar hafði Japan 0-2 útisigur eftir markalausan fyrri hálfleik. Liðin mættust næst á glænýjum City of Manchester Stadium (nú Etihad Stadium) árið 2004 á sérstöku æfingarmóti sem England hélt í undirbúningi sínum yfir EM það ár. Þar hafði Japan 3-2 sigur í hörkuleik en Heiðar Helguson gerði bæði mörk Íslands í leiknum. Liðin mættust svo í vináttuleik í Tókýó árið 2012, Japan hafði þar þægilegan 3-1 sigur þar sem Arnór Smárason gerði mark Íslands úr vítaspyrnu í uppbótartíma. Heiðar Helguson er markahæstur Íslendinga gegn Japan

Stefán Ingi Sigurðarson, sóknarmaður Go Ahead Eagles í Hollandi, er meðal nýliða í íslenska landsliðshópnum sem mætir Japan í vináttulandsleik á sunnudag. Arnar Gunnlaugsson landsliðsþjálfari sagði þegar hópurinn var kynntur að eftir góða þróun á ferli Stefáns væri næsta skref að hann fengi að prófa sig í landsliðsumhverfi.

   29.05.2026 13:43

Rosalega glaður og stoltur eftir að hafa fengið SMS frá Arnari

„Mér leið gríðarlega vel, rosalega glaður og stoltur af því að fá kallið í þetta verkefni. Arnar sendi á mig SMS hvort ég væri laus í spjall og þá fannst manni líklegt að maður væri að fara með. Við áttum svo gott samtal og gaman að geta rætt við hann í raun í fyrsta skipti," segir Stefán. Hann segir æfingar hafa gengið vel. „Það var smá stress að vera í A-landsliðinu í fyrsta sinn en það er gaman að geta verið með góðum leikmönnum og geta reynt að sýna sig. Þetta er aðeins öðruvísi hópur því þetta er utan glugga en þetta er gott tækifæri fyrir mig að kynnast reynslumiklum leikmönnum."

Sendiráð Íslands í Tókýó bauð íslenska landsliðinu í sérstaka heimsókn á föstudag en liðið er í borginni að búa sig undir vináttulandsleik gegn Japan sem fram fer í dag.

   30.05.2026 08:25

Landsliðið heimsótti sendiráð Íslands í Tókýó

„Sælla minninga skoraði ég í leik með landsliðinu 1994 gegn úrvalsliði Japans eða eitthvað í þá áttina.“ Sagði Arnar léttur á blaðamannafundi er hópurinn var kynntur á dögunum.

   13.05.2026 16:30

Á góðar minningar frá Japan - „Of ungur til að kunna meta sushi og menninguna“

„Þannig að ég hef komið til Japans. Ég var allt of ungur til þess að kunna meta Sushi og menningu Japana. Núna er ég gamall og vonandi vitur, þannig ég mun klárlega njóta vel í Japan.“

Arnar Gunnlaugsson valdi tvo mismunandi hópa fyrir leikina tvo sem nú fara í hönd. Hópurinn sem mætir Japan er eftirfarandi. 1. Ögmundur Kristinsson (m) 12. Hákon Rafn Valdimarsson (m) 13. Adam Ingi Benediktsson (m) 2. Logi Tómasson 3. Daníel Leó Grétarsson 4. Valgeir Lunddal Friðriksson 6. Hjörtur Hermannsson 7. Willum Þór Willumsson 9. Benóný Breki Andrésson 10. Ísak Snær Þorvaldsson 11. Stefán Ingi Sigurðarson 14. Andri Fannar Baldursson 15. Dagur Dan Þórhallsson 16. Stefán Teitur Þórðarson 17. Aron Einar Gunnarsson 18. Gísli Gottskálk Þórðarson 19. Mikael Egill Ellertsson 20. Kristian Hlynsson 21. Alfons Sampsted 22. Brynjólfur Willumsson 23. Hörður Björgvin Magnússon Breytingar hafa orðið á hópnum frá fyrsta vali. Adam Ingi Benediktsson, Valgeir Lunddal Friðriksson voru ekki valdir í fyrstu. Þá var Stefán Teitur Þórðarson upprunalega valinn í leikinn gegn Argentínu en færður yfir í hópinn til Japan síðar. Einnig var Viktor Bjarki Daðason upprunalega valinn til þess að spila leikinn en hann þurfti að draga sig úr hópnum vegna meiðsla og var Ísak Snær Þorvaldsson kallaður upp í hans stað.

Heil og sæl kæru lesendur og verið hjartanlega velkomin í þessa beinu textalýsingu Fótbolta.net frá leik Japans og Íslands. Leikið er í Tókýo og flautað verður til leiks nú klukkan 10:25