„Leikurinn leggst bara vel í mig, það er spennandi verkefni að fara í leik á móti toppliðinu. Við þurfum að eiga toppleik til að ná í úrslit," segir Ægir Jarl Jónasson í samtali við Fótbolta.net aðspurður um leikinn.

Hann var spurður hvort hann horfi á leikinn sem tækifæri til að kveikja almennilega í og búa til toppbaráttu?

„Auðvitað væri það mjög skemmtilegt fyrir deildina að fá spennu í þetta á lokasprettinum en Víkingarnir eru búnir að vera frábærir í sumar," sagði Ægir jafnframt.

Eina liðið sem Fram hefur eiginlega ekki átt séns í er Víkingur í fyrri leiknum, Ægir segir liðið hafa þá átt slæman dag.

„Við áttum bara ekki góðan dag þá og margt sem við gátum gert betur en að sama skapi voru þeir líka mjög góðir og beittir í þeim leik."

Víkingar fóru létt með Framara í 11. umferð og enduðu leikar 5-0 á salatinu í Úlfarsárdal.

Fimm leikir fara fram klukkan 14:00 í dag vegna þess að umferðin er sú síðasta fyrir tvískiptingu. Leikið var í Keflavík í gærkvöld vegna Ljósanætur.

Víkingur er með átta stiga forskot á 2. og 3. sætið þegar sex umferðir eru eftir af mótinu. Með sigri Fram kæmi liðið sér í möguleikann á 2. sætinu. Það færi þá eftir því hvort KR misstígi sig á Akranesi gegn ÍA á sama tíma.

Liðin sem enda í 1. og 2. sæti mætast innbyrðis í 27. umferð, lokaumferð mótsins, á heimavelli Víkings.

Heilir og sælir lesendur góðir og verið hjartanlega velkomin í þráðbeina textalýsingu frá Víkingsvelli þar sem Íslandsmeistararnir taka á móti Frömurum.