Heimir Hallgrímsson.
Leikur Kasakstan og Íslands á laugardag fer fram innandyra á gervigrasi enda er mikið frost ytra þessa dagana. Heimir Hallgrímsson, annar af landsliðsþjálfurum Íslands, ræddi um gervigrasið í sjónvarpsþætti Fótbolta.net á ÍNN í kvöld.
,,Þetta er ólíkt því sem okkar leikmenn eiga að venjast," sagði Heimir.
,,Margir leikmenn íslenska landsliðsins hafa jafnvel aldrei spilað á gervigrasi. Það var ein af þeim ástæðum að við ákváðum að fara snemma til Kasakstan til að aðlagast aðstæðum."
,,Við erum kannski brenndir frá því í U21 árs leiknum okkar í Kasakastan þar sem að tvö mörk komu þar sem að menn kunnu ekki í völlinn. Við ætlum að reyna að brenna okkur ekki á því."
Heimir segist búast við að fleiri landslið og félagslið muni spila á gervigrasi í framtíðinni.
,,Þetta er að verða algengara og algengara í Svíþjóð og Noregi. Það er sérstakt að við skulum vera á eftir. Við erum yfirleitt á undan öllum í svona hlutum. Þetta er óhjákvæmilega framtíðin. Þetta gras er alltaf að verða betra og betra svo ég hræðist ekki þessa þróun."
,,Íslensk lið fá sjaldan að æfa á heimavellinum sínum, sem er fáránlegt. Með því að setja gervigras, þá getur heimaliðið æft á vellinum. Oft á tíðum er heimavöllurinn eins og útivöllur fyrir leikmenn heimaliðsins því að þeir fá aldrei að fara inn á völlinn."
Hér að ofan má sjá viðtalið við Heimi í heild sinni.
Athugasemdir
