Hinn 18 ára gamli Hörður Fannar Björgvinsson byrjar í marki Stjörnunnar gegn Víkingi Ólafsvík í Borgunarbikarnum klukkan 20:00.

Duwayne Kerr, markvörður Stjörnunnar, er farinn með landsliði Jamaíka á Copa America og verður ekki með liðinu í kvöld frekar en í næstu tveimur deildarleikjum.

Guðjón Orri Sigurjónsson, varamarkvörður, er á meiðslalistanum og Sveinn Sigurður Jóhannesson er í láni hjá Fjarðabyggð.

Stjarnan fékk undanþágu til að fá félagaskipti fyrir markmannsþjálfarann Fjalar Þorgeirsson í vikunni. Fjalar byrjar á bekknum en Hörður er í markinu.

Hörður lék með yngri flokkum Stjörnunnar áður en hann fór til Fram þar sem hann spilaði nokkra leiki í Pepsi-deildinni 2014. Hann kom aftur til Stjörnunnar á láni frá KR í vor.

Bæði lið gera nokkrar breytingar á byrjunarliði sínu í kvöld frá því í síðasta deildarleik.

Smelltu hér til að sjá textalýsingu úr Garðabæ