Portúgal fer áfram. Ísland verður ekki með á HM á næsta ári. Viðtöl, einkunnir og frekari umfjöllun koma inn á síðuna í kvöld. Takk fyrir samfylgdina.

Tveimur mínútum bætt við.

Portúgal með skot í hliðarnetið.

Joana Marchão með skot sem Sandra ver.

Silva kemur boltanum í netið en er dæmd rangstæð.

Portúgal nálægt því að skora fjórða markið. Capeta skallar framhjá úr dauðafæri.

Frábær mynd sem Jónína Guðbjörg tók fyrr í leiknum.

GLÓDÍS MEÐ GEGGJAÐA VÖRN! Kastar sér fyrir skot frá Diana Silva sem var í dauðafæri.

Uppbótartími fyrri hluta framlengingar.

AGLA MARÍA kemst í skotfæri en Ana Borges nær að renna sér fyrir og kemur í veg fyrir að skot kæmist á rammann. Þetta tækifæri kom eftir virkilega flotta sókn íslenska liðsins.

Portúgal að soga upp alla lausa bolta á miðsvæðinu þessa stundina.

Joana Marchão reynir skot úr þröngri stöðu. Yfir.

Hornspyrnan veldur usla en boltinn fer svo afturfyrir og dæmd er markspyrna. Sýndist boltinn reyndar ekkert vera farinn út af.

Jæja Ísland fær hornspyrnu. Agla María mætir á vettvang til að taka spyrnuna.

Það verður hægara sagt en gert að jafna þetta aftur. Ég hreinlega veit ekki hvort íslenska liðið sé með orku til þess að gera það.

Diana Silva með skot talsvert framhjá.

Ísland að sækja!! Alexandra með skot en fer í Söru. Portúgal kemst í skyndisókn.

FRAMLENGINGIN ER HAFIN Það var skiljanlegt þreytumerki á íslenska liðinu í lok venjulegs leiktíma. Ekkert grín að vera manni færri í svona langan tíma. Ísland hóf framlenginguna.

Æsispennandi framlenging framundan.

VENJULEGUM LEIKTÍMA ER LOKIÐ - ÞAÐ ER FRAMLENGT Liðið sem vinnur í framlengingu fer beint á HM, ef úrslitin ráðast í vítakeppni þá mun sigurliðið líklegast fara í áframhaldandi umspil á næsta ári.

+5 Þetta hefur verið ansi þungt síðustu mínútur. Erfið framlenging sem bíður, nema skorað verði á þessari síðustu mínútu uppbótartímans.

+4 Francisca Nazareth með lipur tilþrif og á svo skot yfir markið.

+3 Agla María hreinsa útaf í innkast.

+2 Portúgal að fá hornspyrnu. Stefnir í framlengingu.

+1 Þung sókn hjá portúgalska liðinu hér í uppbótartímanum. Sex mínútum bætt við.

Hættuleg portúgölsk fyrirgjöf en Dagný nær að skalla afturfyrir í horn. Lokamínúta venjulegs leiktíma.

Francisca Nazareth með skot af löngu færi en vel yfir.

Sveindís með vippu inn á teiginn en of innarlega og Morais handsamar boltann.

Selma Sól með hættulega sendingu og Sveindís í fínu færi en boltinn skoppar óheppilega fyrir hana, þarf að teygja sig í knöttinn og nær ekki að beina honum að markinu.

Dómari leiksins er að eiga hræðilegan dag. Mjög vafasamir og furðulegir dómar. Í þessu tilfelli þar sem hún dæmir þessa hendi var hún hreinlega bara að giska. Dæma á líkum. Svoleiðis gerir maður ekki.

DÓMURINN ER TEKINN TIL BAKA. EKKI VÍTI! Hárrétt að taka þetta til baka.

Frappart dómari veit ekki sitt rjúkandi ráð. Dæmir víti á Alexöndru en hættir svo við eftir að hafa skoðað þetta betur. pic.twitter.com/QOF7UfMj6Q

— RÚV Íþróttir (@ruvithrottir) October 11, 2022

Þessi dómur er algjört bull. Alexandra með höndina upp við líkamann. Frappart fer í skjáinn. Þetta hlýtur að vera tekið til baka.

PORTÚGAL FÆR VÍTASPYRNU! DÆMD HENDI Á ALEXÖNDRU!

Tatiana Pinto í HÖRKUFÆRI en Guðný kemst fyrir skot hennar.

Carole Costa með tilraun af löngu færi. Vel framhjá.

Jéssica Silva með skot rétt framhjá!

NEEEEIIII!!!! Sveindís fer milli tveggja varnarmanna og kemur sér í hörkugott færi en setur boltann framhjá!

Þessi seinni hálfleikur. Sveindís í dauðafæri hérna. Minni á að við erum einum færri. pic.twitter.com/HCQQKBDM9X

— RÚV Íþróttir (@ruvithrottir) October 11, 2022

Portúgal fær hornspyrnu. Glódís Perla skallar frá, Gomes setur svo boltann upp í loftið og Sandra handsamar hann af öryggi.

Boltinn inn á portúgalska teiginn. Sveindís Jane með fyrirgjöf en dæmd er aukaspyrnu á Alexöndru. Bakhrinding.

Diana Gomes með skot úr þröngu færi. Nær ekki að hitta rammann.

Hættuleg sókn Portúgals en á síðustu stundu mætir Glódís Perla og bjargar í hornspyrnu.

Íslenska liðið hefur spilað feikilega vel þennan kafla sem það hefur verið tíu gegn ellefu.

Sveindís Jane með marktilraun himinhátt yfir.

Portúgal með skot framhjá. Jessica Silva úr nokkuð þröngu færi.

Þvílíkar sviptingar í þessu. Íslenska liðið fagnaði, hélt að það væri komið yfir en VAR tók markið af. Svo kemur strax í kjölfarið víti og rautt spjald í andlitið á okkar liði. Útlitið er dökkt. Nú þarf liðið að sýna alvöru karakter.

Frappart fór í skjáinn og skoðaði þetta aftur. Metur það að Áslaug Munda hafi rænt upplögðu marktækifæri. Stendur við dóminn.

Fyrst dæmt mark en svo fer Frappart dómari í skjáinn og dæmir markið af. Það var brot í aðdragandanum. Guðný með óþarfa peysutog á Diönu Silva sem hefði væntanlega ekki náð til boltans.

Ohh... Markið tekið af okkur. Ennþá 0-0. pic.twitter.com/az8Ipdj5B8

— RÚV Íþróttir (@ruvithrottir) October 11, 2022

MARK!!! SVEINDÍS NÆR AÐ KOMA BOLTANUM Í NETIÐ! NEI ÞETTA MARK ER TEKIÐ AF!

Jéssica Silva kemst ein í gegn en Sandra ver frá henni. Hefði ekki talið því hún var kolrangstæð. Það er VAR í þessum leik, minnum á það.

Áslaug Mundu á Gunnhildi Yrsu sem kom upp vinstra megin, Gunnhildur hitti boltann skelfilega illa og fyrirgjöf hennar beint afturfyrir.

Diana Silva með tilraun, Glódís Perla setur höfuðið fyrir boltann.

Seinni hálfleikur er farinn af stað Óbreytt lið. Guðný heldur leik áfram.

Guðný kemur með út á völl og það verður engin breyting strax.

Elísa Viðarsdóttir hitar upp eins og hún sé að koma inn á. Spurning hvort Guðný sé meidd og geti ekki haldið leik áfram.

Ég held að það séu miklu fleiri en 3000 hér á leikvanginum. Þegar leið á fyrri hálfleikinn þá fór allt í einu að hópast inn á leikvaginn. Það streymdi gjörsamlega inn. Ég veit ekki alveg ástæðuna fyrir því.

Staðan markalaus í hálfleik en svo sannarlega pláss fyrir bætingu þegar kemur að því að halda í boltann, það þarf að tengja fleiri sendingar. En íslenska liðið fékk mjög góð færi á lokakafla fyrri hálfleiksins og hefði með smá heppni getað verið í forystu.

Það verður bara að segjast eins og er...

Dapur fyrri hálfleikur, geta miklu betur. Verðum að þora að halda í boltann, verðum að sýna meira hugrekki. Varð betra eftir því sem leið á og fengum besta færi leiksins til þessa, en frammistaðan heilt yfir verið slök ⚽️

Koma svo 🇮🇸

— Guðmundur Ásgeirsson (@gummi_aa) October 11, 2022

Jónína Guðjörg Guðbjartsdóttir ljósmyndari Fótbolta.net er í Portúgal:

Guðný Árnadóttir varð fyrir tæklingu í lok fyrri hálfleiksins og fær aðhlynningu í hálfleiknum væntanlega.

Ein mínúta í uppbótartíma fyrri hálfleiks.

BERGLIND BJÖRG HITTIR EKKI BOLTANN Í DAUÐAFÆRI! Sveindís rennir boltanum fyrir þar sem Berglind er í dauðafæri og hittir ekki boltann. Selma fær svo boltann óvænt í sig.

Það er aðeins að lifna yfir þessu hjá íslenska liðinu en markalaust í hálfleik. Þetta gerðist í blálok fyrri hálfleiks. pic.twitter.com/R1UiCUJ65x

— RÚV Íþróttir (@ruvithrottir) October 11, 2022

Ísland fær hornspyrnu. Glódís Perla við nærstöngina og nær að reka hausinn í boltann en fleytir honum afturfyrir.

Sveindís Jane kemur sér inn í teiginn en boltinn hirtur af henni.

GUNNHILDUR YRSA MEÐ SLÁARSKOT!!! Áslaug Munda með aukaspyrnu inn í teiginn, markvörður Portúgals grípur í tómt og boltinn dettur á Gunnhildi Yrsu í teignum. Hún gerir vel en setur boltann í slána! Þarna munaði rosalega rosalega litlu.

Úfff! Gunnhildur Yrsa setur hann í þverslána! Besta færi Íslands. pic.twitter.com/bV1sl5z5w3

— RÚV Íþróttir (@ruvithrottir) October 11, 2022

Sveindís Jane og Ana Borges í baráttunni.

Hár bolti inn í teig Íslands sem Sandra kýlir í burtu.

Guðný Árnadóttir með fyrirgjöf sem er misheppnuð og fer afturfyrir.

Ísland er því miður að eiga í rosalegum erfiðleikum með að tengja saman sendingar. Portúgal með yfirhöndina á miðsvæðinu.

Jéssica Silva heldur áfram að ógna. Portúgalska liðið mun beinskeyttara en okkar lið. Silva kom sér í gott skotfæri en hitti sem betur fer ekki á rammann.

Jéssica Silva með skot fyrir utan teig, vel yfir markið. Engin hætta á ferðum.

Jasmín Erla og Agla María eru að hita upp.

Portúgal með fyrirgjöf frá hægri sem Ingibjörg skallar frá.

Sveindís með háa sendingu fyrir sem Sara Björk nær að skalla en af löngu færi og máttlítið. Auðveldlega gripið hjá Patricia Morais.

Boltinn hrekkur á Selmu Sól sem á skot yfir markið. Rétt áður átti Ingibjörg skot sem fór í varnarmann.

Selma Sól reynir fyrirgjöf frá hægri en boltinn í bakvörð portúgalska liðsins og í innkast.

Portúgalska liðið sér um að sækja. Fékk þrjár hornspyrnur í röð.

VÁ, hörkuskot, Jéssica Silva með skot eftir hornspyrnuna en Sandra með góð viðbrögð og nær að verja boltann yfir þverslána.

Besta færi leiksins til þessa eiga Portúgalar á 20. mínútu en Sandra með glæsilega vörslu. pic.twitter.com/TSHNqKv2tC

— RÚV Íþróttir (@ruvithrottir) October 11, 2022

Portúgal fær hornspyrnu. Áslaug Munda setti boltann í horn.

Portúgal er að spila með tígulmiðju og tvo strikera.

Það er augljóst að markvörður Portúgala er mjög léleg í því að sparka fram. Þurfum að reyna að nýta okkur það. Hún drífur ekki fram að miðju.

Selma með góðan bolta fyrir en Dagný rétt missir af honum!

Ísland á aukaspyrnu á fínum stað. Fyrirgjafarstaða.

Portúgalar áttu svo fína sókn hinum megin og voru með skot tilraun sem Sandra átti í engum vandræðum með. Svo kom Víkingaklapp. Allt að gerast!

Frábær sókn hjá Íslandi. Guðný með góðan sprett og frábæra sendingu svo á Sveindísi úti vinstra megin. Sveindís tekur við honum á sendingu út í teiginn þar sem enginn leikmaður íslenska liðsins er. Þetta var það besta frá Íslandi til þessa.

Dagný vinnur fyrsta boltann en við tökum ekki seinni boltann á teignum. Selma fær boltann við vítateigslínuna í kjölfarið en hittir hann ekki nægilega vel.

Heimakonur skalla frá og við fáum annað innkast.

Markvörður Portúgala í hafinu er hún reynir að spyrna boltanum fram. Hittir boltann ekki vel, en Berglind nær ekki til hans. Boltinn í innkast. LANGT INNKAST!

Íslenska liðið er ekki að ná að halda nægilega vel í boltann hérna í byrjun leiks. Þurfum að ná meiri ró og yfirvegun í þetta.

Það er rosalega mikið undir hér í kvöld, andrúmsloftið er rafmagnað.

Jessica Silva liggur eftir og þarf aðhlynningu. Ég sá ekki hvað gerðist.

Portúgalar að komast í hættulega stöðu en Glódís bjargar vel. Stuttu áður var Ísland í álitlegri stöðu en Selma átti þá slaka sendingu.

Sveindís vinnur boltann og er að fara að taka á sprett þegar brotið er á henni. Þetta er spjald dómari!

Heimakonur taka spyrnuna stutt og Selma er fljót að vinna boltann. Vel gert!

Hár bolti inn fyrir vörnina og Ingibjörg setur hann aftur fyrir endamörk. Hornspyrna sem Portúgal á.

Dagný er í öðru hlutverki í dag. Er að spila sem sóknarsinnaður miðjumaður með Söru og Gunnhildi fyrir aftan sig. Það hefur verið kallað eftir þessu og verður fróðlegt að sjá hvernig það virkar. Byrjunarlið Íslands fyrir leikinn í dag.

'Hype-maðurinn' reynir að kveikja í Portúgölum en Íslendingar eiga þessa stúku þó við séum í miklum minnihluta. Þvílík læti hjá okkar fólki! Þetta er komið af stað. Portúgal á upphafssparkið.

Þjóðsöngvarnir að baki. Þetta er að bresta á!

Liðin eru að ganga út á völl!

Það heyrist gríðarlega vel í íslenska stuðningsfólkinu. Á meðan eru Portúgalarnir með einhvern 'hype-man' á mæknum til að reyna að koma stuðinu í gang hinum megin. Frábært okkar fólk hér í Portúgal!

Það er sungið til Dúnu styrktarþjálfara. Hún snýr sér við, brosir og vinkar. Skemmtilegt!

Veðrið hérna í Portúgal er svo gott sem fullkomið. Um 20 gráður og sólin er á lofti.

Stuðningsfólk Íslands hefur fengið hvítar derhúfur að gjöf í fluginu hingað til Portúgals. Þau eru flestöll í stúkunni með svona derhúfu.

Upphitun er í fullum gangi. Hér er Jasmín Erla Ingadóttir sem gæti spilað sinn fyrsta A-landsleik í dag.

Það er núna rúmur hálftími í lekinn. Það styttist í þetta!

Stelpurnar okkar mættu langt á undan Portúgölunum í upphitun. Portúgalarnir virðast heldur rólegri í þessu. Stuðningsfólk Íslands er mætt út á völl og er nú þegar farið að láta vel í sér heyra. Guðni Th. Jóhannesson, forseti Íslands, lætur sig ekki vanta!

Selma Sól kemur inn í byrjunarliðið! Ein breyting er á liði Íslands frá leiknum gegn Hollandi í síðasta mánuði. Selma Sól Magnúsdóttir kemur inn í liðið fyrir Svövu Rós Guðmundsdóttur sem tekur sér sæti á bekknum. Sara Björk Gunnarsdóttir er klár í að byrja leikinn en hún hefur glímt við veikindi og æfði ekki með liðinu í gær.

Frá æfingu Íslands í gær Íslenska liðið æfði á keppnisvellinum í gær. Jónína Guðjörg Guðbjartsdóttir tók myndir á æfingunni. Hægt er að nálgast myndaveislu hérna. Og hér fyrir neðan má sjá nokkrar myndir.

Fleiri myndir frá vellinum

Búist við 3000 áhorfendum Leikurinn fer fram á Estádio Capital do Móvel í Paços de Ferreira, sem er úthverfi í Porto í Portúgal. Portúgal hefur verið á uppleið í kvennaboltanum síðustu ár en samt sem áður virðist ekki mikill áhugi á leiknum hér í landi. Það er búist við 3000 áhorfendum á leikvanginn sem er með pláss fyrir rúmlega 9000 manns. Það kemur til með að heyrast vel í Íslendingum því Vísir sagði frá því í gær að uppselt hefði verið í flugvél Icelandair til Porto í morgun. Það er áhugavert að velta því fyrir sér hvað hefði orðið ef leikurinn færi fram á Laugardalsvelli - hvort það væri uppselt þá - en dregið var um það hvort liðið myndi fá heimaleik.

Lykilatriði að ná að fylla skarðið sem Karólína skilur eftir Karólína Lea Vilhjálmsdóttir, leikmaður Bayern München, er ekki með Íslandi í dag vegna meiðsla. Það er svo sannarlega stórt skarð að fylla. Hún var algjörlega frábær á EM og er sá leikmaður í íslenska liðinu sem skapar mest. Við þurfum að þora að halda í boltann og finnar leiðir til að skapa góð færi í hennar fjarveru.

Portúgal vann Belgíu til að komast í þennan leik Portúgal vann heldur óvæntan sigur gegn Belgíu á dögunum en þær voru mun sterkari aðilinn í leiknum og var sigurinn mjög verðskuldaður. "Portúgalska liðið er mjög agressívt og beinskeytt. Þú þarft að vera tilbúin í bardaga á móti þeim og mér fannst Belgarnir ekki vera það. Sóknarlega voru Belgarnir í vandræðum. Það vantaði tvo leikmenn sem eru framarlega hjá þeim og skipta miklu máli. Það hafði mikil áhrif," sagði Þorsteinn Halldórsson, landsliðsþjálfari, í viðtali í gær. Ísland, sem gerði jafntefli við Belgíu á EM í sumar, þarf að vera tilbúið í bardagann.

Vorum bara 30 prósent með boltann en okkur tókst samt að vinna https://t.co/cBiFgkZlOs

— Fótbolti.net (@Fotboltinet) October 11, 2022

Frappart með flautuna Hin franska Stephanie Frappart mun dæma leikinn en hún er talin besti kvendómari heims og mun starfa á HM karlalandsliða sem hefst í Katar í næsta mánuði. Hún varð 2020 fyrsta konan til að dæma leik í Meistaradeild karla en árið á undan varð hún fyrsta konan til að dæma leik í efstu deild franska boltans og stórleik í Evrópuboltanum. Hún dæmdi franska bikarúrslitaleikinn í karlaflokki á síðasta tímabili. Dómarinn og aðstoðardómararnir eru franskir en fjórði dómarinn frá Skotlandi. Notast verður við VAR í leiknum í dag og verða það franskir karlkyns dómarar sem sjá um VAR dómgæsluna, Francois Letexier og Pierre Gaillouste.

Ísland unnið allar viðureignir gegn Portúgal frá aldamótum Ísland og Portúgal hafa níu sinnum mæst í A-landsliði kvenna, Ísland hefur unnið sex leiki, Portúgal tvo og einn hefur endað með jafntefli. Íslenska liðið hefur unnið allar viðureignir við Portúgal frá aldamótum eða sex leiki í röð. Síðast mættust liðin 2019 í leik á Algarve bikarnum og þar vann Ísland 4-1 stórsigur. Agla María Albertsdóttir, Selma Sól Magnúsdóttir, Margrét Lára Viðarsdóttir og Svava Rós Guðmundsdóttir skoruðu mörk Íslands. Smelltu hér til að fræðast enn frekar um innbyrðis viðureignir Íslands gegn Portúgal á vefsíðu KSÍ. Selma Sól Magnúsdóttir.

Líklegt byrjunarlið Við teljum að það verði ein breyting gerð frá leiknum gegn Hollandi í síðasta mánuði. Agla María Albertsdóttir er búin að ná sér af meiðslum og við giskum á að hún komi inn fyrir Svövu Rós Guðmundsdóttur sem byrjaði í Utrecht.

Verður Sara Björk með? Sara Björk Gunnarsdóttir, landsliðsfyrirliði, æfði ekki í gær vegna veikinda sem hún er að glíma við. Það er samt líklegt að hún verði með í dag. "100 prósent," sagði Adda í viðtali í gær þegar hún var spurð að því hvort Sara myndi byrja leikinn í kvöld. Sara Björk Gunnarsdóttir.

Viðtöl í aðdraganda leiksins Fréttateymi Fótbolta.net lendi í Porto seint á sunnudagskvöldið. Í gær voru viðtöl við þjálfara og leikmenn á hóteli liðsins. Hér fyrir neðan má finna tengla á viðtölin. Steini: Hún taldi það best fyrir alla að hún myndi stíga út úr þessu strax Dagný: Vona innilega að allt sé þegar þrennt er á þessu ári Berglind Björg: Ég viðurkenni að þær komu mér pínu á óvart

"Þetta er einn stærsti leikur sem íslenska landsliðið hefur spilað í mörg ár," sagði Ásgerður Stefanía Baldursdóttir, fyrrum landsliðskona, við undirritaðan í gær. Það er vel hægt að taka undir það. Þetta er einn stærsti leikdagur í sögu íslenska kvennalandsliðsins, hjá stelpunum okkar. Þetta er hreinn úrslitaleikur þar sem sigurliðið kemur til með að vinna sér sæti á HM sem fram fer á næsta ári - eða þá inn í annað umspil sem fram fer í Nýja-Sjálandi í febrúar á næsta ári.

Góðan daginn kæru lesendur! Verið velkomin í beina textalýsingu frá leik Portúgal og Íslands í umspilinu fyrir HM í Ástralíu og Nýja-Sjálandi. Hérna er allt undir!