Berglind Björg Þorvaldsdóttir.
Á landsliðsæfingu.
Það er stórleikur framundan.
„Þessir dagar hafa verið frábærir. Við höfum náð að æfa vel og undirbúa okkur vel fyrir þennan leik," segir Berglind Björg Þorvaldsdóttir, leikmaður íslenska landsliðsins, í samtali við Fótbolta.net.
„Í byrjun vissum við ekki hvað við vorum að undirbúa okkur fyrir, en þetta er búið að vera frábær tími."
„Í byrjun vissum við ekki hvað við vorum að undirbúa okkur fyrir, en þetta er búið að vera frábær tími."
Landsliðið kom til Porto í gærkvöldi eftir að hafa verið í æfingabúðum á Algarve í nokkra daga.
Á Algarve komst liðið að því að andstæðingurinn í umspilinu fyrir HM er Portúgal og því var flogið innanlands yfir til Porto þar sem liðið æfir á keppnisvellinum í dag.
Á morgun spilar Ísland einn sinn mikilvægasta leik í sögunni er við mætum Portúgal á útivelli. Þetta er hreinn úrslitaleikur þar sem sigurliðið kemur til með að vinna sér sæti á HM sem fram fer á næsta ári - eða þá inn í annað umspil sem fram fer í Nýja-Sjálandi í febrúar á næsta ári.
Portúgal vann sigur gegn Belgíu til þess að komast inn í þennan leik, en þær voru mun sterkari aðilinn í þeim leik.
„Við horfðum allar saman á leikinn, Portúgal - Belgía, og það er virkilega spennandi leikur framundan. Ég viðurkenni að þær komu mér pínu á óvart, en þær stóðu sig gríðarlega vel á EM og eru með mjög gott lið. Það verður áskorun að spila á móti þeim."
Mjög góður tími í París
Berglind er núna samningsbundin Paris Saint-Germain, sem er eitt stærsta félagsliðið í Frakklandi. Hún segir að tíminn í París sé búinn að vera góður.
„Tíminn er búinn að vera mjög góður. Það er mjög gaman að æfa með heimsklassa leikmönnum og við topp aðstæður. Ég er gríðarlega sátt," sagði Berglind.
Væri hún til í að vera búin að spila meira?
„Já, klárlega. En þetta er þolinmæðisvinna. Maður labbar ekki inn í svona lið. Þrátt fyrir lítinn spiltíma er þetta búið að vera frábært og góðar æfingar. Tíminn mun koma," segir Berglind sem hefur ekki haft mikinn tíma til að skoða París. „Þetta er æðisleg borg."
Hver stórleikurinn á fætur öðrum
„Það er alltaf gaman að koma hingað og hitta fólkið sitt. Að vera í þessu umhverfi er draumur," segir Berglind um það að koma aftur í landsliðið.
Liðið er búið að spila marga stórleiki upp á síðkastið; Frakkland á EM, Holland í síðasta mánuði og núna Portúgal.
„Þetta er ástæðan fyrir því að maður er í fótbolta. Maður vill spila þessa stóru leiki. Þetta er bara draumur."
Er liðið búið að liggja yfir Portúgölunum síðustu daga?
„Við leikmennirnir erum ekki búnar að gera það, en ég býst við að Steini og félagar séu búnir að vera að gera það. Davíð Snorri var með fund um Portúgal fyrir nokkrum dögum og við fengum sýn á það hvernig þær spila og svona. Það verður fundur í kvöld með Steina," segir Berglind en hvernig eru möguleikarnir?
„Við þurfum að eiga toppleik og sýna hvað við erum góðar í. Þá efast ég ekki um að við komumst á EM, nei HM!" sagði Berglind og hló en allt viðtalið er hér að ofan.
