Dræm mæting Veðrið gæti sett smá strik í reikningin hér í kvöld.

Ég á ekki von á því að sjá marga Njarðvíkinga hér í kvöld þar sem körfuboltalið félagsins er í leik tvö í undanúrslitaseríu um Íslandsmeistaratitilinn við Val suður með sjó á sama tíma. Njarðvíkingar leiða það einvígi 1-0 og síðustu fregnir herma að Ljónagryfjan í Njarðvík sé þétt setinn.

Róbert Hauksson var Njarðvíkingum erfiður í fyrra Þegar þessi lið mættust á síðustu leiktíð á heimavelli Leiknis höfðu Leiknismenn betur með þremur mörkum gegn engu. Njarðvíkingar áttu þá í stökustu vandræðum með Róbert Hauksson í liði Leiksins sem skoraði tvö mörk og lagði upp fyrsta. Hann byrjar hér í dag fyrir heimamenn og spurning hvort hann verði gestunum aftur til vandræða í kvöld.

Leikurinn í beinni

Innbyrðis viðureignir Þessi lið hafa 19 sinnum mæst í mótsleik á vegum KSÍ.

Leiknir hafa 11 sinnum (58%) haft betur.
Njarðvíkingar hafa 5 sinnum (26%) hrósað sigri.
Liðin hafa þá þrívegis (16%) skilið jöfn.

Markatala 39-21 Leiknismönnum í vil.

Dómarateymið Sveinn Arnarsson heldur utan um flautuna hér í kvöld og honum til aðstoðar verða Bryngeir Valdimarsson og Ragnar Þór Bender.
Garðar Örn Hinriksson er eftirlitsdómarinn hjá okkur í kvöld.

Leiknir R. Leiknismönnum er kannski nokkuð óvænt spáð sjöunda sæti.

Styrkleikar: Að fara inn í annað ár spilandi skemmtilegan bolta undir Fúsa og Donna. Ég hef mikla trú á þessu verkefni og finnst Leiknir með gott lið. Eiga alltaf að geta skorað mörk með einn besta senterinn í deildinni.

Veikleikar: Hafa verið að leka full mörgum mörkum en það er ákveðinn fórnarkostnaður við djarfan leikstíl á meðan þeir mastera hann.

Lykilmenn:

Daði Bærings Halldórsson - Leiðtoginn, virkilega öflugur varnarlega hvort sem hann spilar hafsent eða miðju, flottur á boltann og ber uppi unga og spræka liðsfélaga á herðunum.

Sindri Björnsson - Einn besti miðjumaður deildarinnar, vinnsla upp og niður völlinn, kannski best að orða þetta bara “gæði og fleira”.

Omar Sowe - Einn af tveimur bestu framherjum deildarinnar myndi ég segja blákalt framan í aðra framherja deildarinnar, að maðurinn sé ekki að spila í Bestu deildinni er guðs gjöf til Leiknismanna.

Fylgist með: Róbert Quental, 19 ára örvfættur kantmaður með mikla tækni, hraða og sprengikraft, kom virkilega vel inn í lið Leiknis í fyrra og ég væntist þess að hann taki mikið til sín í sumar.

Komnir:
Aron Einarsson frá Selfossi
Arnór Daði Aðalsteinsson frá Fram
Arnór Ingi Kristinsson alfarið frá Val (var á láni)
Sigurður Gunnar Jónsson á láni frá Stjörnunni
Þorsteinn Emil Jónsson frá Val

Farnir:
Árni Elvar Árnason í Þór
Valgeir Árni Svansson í Aftureldingu
Daníel Finns Matthíasson í Stjörnuna (var á láni)
Indrit Hoti í Ými (var á láni frá Haukum)

   26.04.2024 18:00

Spá þjálfara og fyrirliða fyrir Lengjudeildina: 7. sæti

   26.04.2024 18:30

„Persónulega þykir mér mjög vænt um síðasta tímabil"

Njarðvík Í tíunda sæti í spáni eru Njarðvíkingar.

Styrkleikar: Gunnar Heiðar er öflugur þjálfari að fara inn í heilt tímabil með liðið en ekki bara koma inn til að slökkva elda, það gæti verið ákveðinn styrkur fyrir Njarðvíkinga, einnig er kjarni leikmannahópsins svipaður og eru Njarðvíkingar að reyna að byggja ofan á þann grunn. Heimavöllurinn er líka alltaf öflugur fyrir Njarðvíkinga, fínn grasvöllur þar sem lognið ferðast vanalega hraðar en annarsstaðar, þeir þekkja vel inn á sitt vígi.

Veikleikar: Njarðvík missti sinn helsta markaskorara frá því í fyrra í Rafa Victor ásamt leiðtoganum Marc McAusland, það eru tvö stór skörð að fylla, Njarðvík sótti markaskorara frá Færeyjum en hann er farinn líka, á eftir að sjá hverjir ætla að skora mörkin fyrir Njarðvík með Oumari Diouck.

Lykilmenn:

Aron Snær Friðriksson - Aron Snær er reyndur efstu deildar markvörður sem mér finnst hreinlega ekki eiga heima í Lengjudeild, hann þarf að eiga gott tímabil til að hjálpa Njarðvíkingum og er hann algjör lykilmaður fyrir þá.

Oumar Diouck - Oumar er virkilega leikinn og skemmtilegur sóknarmaður, fáir betri í deildinni í að koma sér yfir á hægri fótinn og krulla boltann í samskeytin fjær, ef hann er upp á sitt besta eru stuðningsmenn Njarðvíkinga “in for a treat” eins og maður segir á vondri íslensku.

Kenneth Hogg - Kenny hefur verið hjá Njarðvík í nokkur ár og hjálpað liðinu með sinn stíganda sem félag, hann er öflugur miðjumaður og getur skilað mörkum og stoðsendingum.

Fylgist með: Amin Cosic, ungur og bráðefnilegur sóknarmaður sem kom til Njarðvíkinga frá HK, hefur raðað inn mörkum í öllum yngri flokkum og verður spennandi að sjá hann undir stjórn markamaskínunnar Gunnars Heiðars.

Komnir:
Aron Snær Friðriksson frá KR
Breki Þór Hermannsson frá ÍA (á láni)
Dominik Radic frá Króatíu
Slavi Kosov frá Búlgaríu
Björn Aron Björnsson frá Víði Garði
Amin Cosic frá HK
Erlendur Guðnason frá KA

Farnir:
Alex Bergmann Arnarsson í Gróttu
Eiður Orri Ragnarsson í KFA
Oliver James Kelaart Torres í Hauka
Marc McAusland í ÍR
Rafael Victor í Þór
Robert Blakala í Selfoss
Kristófer Snær Jóhannsson til Molde
Luqman Hakim til Kortrijk (var á láni)
Tómas Þórisson til Víkings R. (var á láni)
Walid Birrou Essafi til Gíbraltar

   25.04.2024 12:00

Spá þjálfara og fyrirliða fyrir Lengjudeildina: 10. sæti

   25.04.2024 12:30

„Kemur ekki á óvart en við vitum annað og meira en hinir"

Lengjudeildin fer af stað Fótbolti.net kynnir liðin sem leika í Lengjudeildinni í sumar eitt af öðru eftir því hvar þeim er spáð. Við fengum alla fyrirliða og þjálfara í deildinni til að spá fyrir sumarið og fengu liðin stig frá 1-11 eftir því en ekki var hægt að spá fyrir sínu eigin liði.

1. Afturelding, 223 stig
2. Þór, 210 stig
3. Keflavík, 205 stig
4. ÍBV, 176 stig
5. Grindavík, 154 stig
6. Fjölnir, 146 stig
7. Leiknir R., 143 stig
8. Þróttur R., 87 stig
9. Grótta, 83 stig
10. Njarðvík, 68 stig
11. ÍR, 66 stig
12. Dalvík/Reynir, 23 stig

Heil og sæl! Verið hjartanlega velkomin til leiks á Domusnovavöllinn í Breiðholtinu þar sem Leiknir taka á mót Njarðvíkingum í fyrstu umferð Lengjudeildarinnar 2024.

Leikurinn fer fram á gervigrasvellinum þar sem aðalvöllurinn er ekki klár í slaginn.

   01.05.2024 09:00

Baddi gegn Benna - Spá fyrir 1. umferð Lengjudeildarinnar