Besta lið mótsins stóð uppi sem sigurvegari! Þvílíkt fótboltalið. Til hamingju Spánn!

Saka fær á sig aukaspyrnu. Síðasta mínútan í uppgefnum uppbótartíma.

Fjórum mínútum bætt við. Að minnsta kosti.

Fyrst er skalli Declan Rice varinn og svo er Guehi í dauðafæri en Olmo bjargar á línu!

Þvílíkt mót sem Olmo hefur átt!

Ollie Watkins vinnur hornspyrnu. Vá vá vá! Það er spenna.

Oyarzabal var nálægt því að vera rangstæður en leikurinn er farinn af stað að nýju, markið stendur.

Spánn fékk horn en Stones reis hæst í teignum og skallaði boltann. Erum við að fara í framlengingu?

Cole Palmer er fyrsti varamaðurinn til að skora jöfnunarmark í úrslitaleik EM síðan Sylvain Wiltord gerði það 2000. Palmer er 22 ára og 69 daga sem gera hann að yngsta varamanni til að skora í úrslitaleik EM.

Glæsileg sókn Spánverja en skotið frá Lamine Yamal er einfaldlega ekki nægilega gott. Pickford ver.

Þetta skot frá Cole Palmer er eiginlega föst sending í fjærhornið.

Hægt er að sjá markið neðar í lýsingunni.

Stemning og stuð í Berlín!

Leikurinn er búinn að breytast og nú eru það Englendingar sem sjá um að sækja með gríðarlegan stuðning frá áhorfendum!

Fyrsta rangstaðan í leiknum!

Fabian Ruiz með skot fyrir utan teig með vinstri en yfir.

Ástæðan fyrir því að Rodri entist bara í fyrri hálfleik er sú að hann lenti í samstuði við Laporte samherja sinn.

Baneitruð skyndisókn Spánar og Yamal nær skoti á markið en Pickford ver vel í hornspyrnu! Flott varsla.

Bellingham tekur geggjaðan snúning, sýnir gæði sín og hristir varnarmenn Spánar af sér áður en hann tekur þéttingsfast skot frá D-boganum. Framhjá.

Phil Foden tekur spyrnuna frá hægri... Laporte nær að skalla boltann frá. Englendingar eiga í vandræðum með að finna glufur á spænsku vörninni.

12. júlí: Nico Williams á 22 ára afmæli.
13. júlí: Lamine Yamal á 17 ára afmæli.
14. júlí: Williams skorar í úrslitaleik EM, eftir sendingu frá Yamal.

Alvaro Morata með marktilraun, setur boltann framhjá Pickford og hann er á leiðinni framhjá en Stones tekur enga áhætu og hreinsar frá. Skömmu seinna á Nico Williams svo þéttingsfast skot framhjá.

Spánverjar herja á Englendinga.

Spánverjar nálægt því að láta kné fylgja kviði og skora strax annað mark!

Marktilraunir: 1-1
Á rammann: 0-1
Með boltann: 66% - 34%
Hornspyrnur: 6-1
Brot: 6-2
Gul spjöld: 1-1

Rodri, lykilmaður á miðju Spánverja, er eitthvað að kveinka sér. Kjartan Henry talar um að hann sé augljóslega ekki heill og það kæmi sér hreinlega á óvart ef hann kæmi út í seinni hálfleik. 'Það yrði hræðilegt fyrir Spánverja ef hann þarf að fara af velli'.

   14.07.2024 18:57

„Rodri verður valinn bestur ef Spánn vinnur mótið“

Besta færi fyrri hálfleiks. Fyrsta skot Englands á markið. Foden í þröngri stöðu og þarf að teygja sig í boltann en vel gert hjá honum að ná skoti á markið og láta reyna á Unai Simon markvörð Spánar.

Bellingham hirðir boltann af Carvajal. Harry Kane með skot en Rodri gerir frábærlega og kemst fyrir skotið. Williams ýtir síðan við Kyle Walker og England á aukaspyrnu frá hægri með fyrirgjafarmöguleika.

John Stones brýtur upp leikinn og ber boltann uppi. Þegar hann er kominn að vítateig Spánverja má hann hinsvegar ekki við margnum og boltinn tekinn af honum. Kröftugur sprettur hinsvegar hjá varnarmanninum en Rodri stoppaði hann.

Jude Bellingham klobbaði Rodri á miðjum vellinum ???? pic.twitter.com/RkBF1gDxso

— RÚV Íþróttir (@ruvithrottir) July 14, 2024

Laporte fer niður í teignum í baráttu við Rice eftir hornspyrnuna. Ekki nægilega mikið til að Letexier sé sendur í skjáinn. Kjartan Henry segist sammála því: 'Ekkert til að skoða hér'

Luke Shaw rænir boltanum af tánum á Yamal og Spánn á hornspyrnu.

Höddi Magg greinir frá því að Spánn hefur verið 66% leiktímans með boltann, England 34%. Færin hafa hinsvegar verið af skornum skammti í þessum úrslitaleik hingað til.

Englendingar ógna við vítateig Spánverja. Cucurella kemur hættunni frá. Hreinsar í burtu.

Foden með sendingu sem Olmo kemst inn í. Yamal kemst í hættulega stöðu í teignum en Guehi kemst fyrir skot hans. Úr verður hornspyrna en Spánn nær ekki að gera sér mat úr henni.

'Johnny, Johnny Stoooones, Johnny, Johnny Stones' syngja stuðningsmenn Englands.

Lamine Yamal ekkert náð að láta ljós sitt skína hingað til og heldur ekki Phil Foden. Andstæðingarnir hafa náð að halda þeim í skefjum.

Dani Olmo með sendingu inn í teiginn sem Pickford á ekki í nokkrum vandræðum með.

Eftir að hafa varla snert boltann í byrjun hefur England átt fínan kafla núna.

Walker með sendingu fyrir. Í fyrsta sinn sem England nær að brjóta varnarlínu Spánverja. Boltinn af Laporte og England fær sitt fyrsta horn. Morata hreinsar hinsvegar frá.

Kyle Walker varð fyrir hnjaski áðan, fór í tæklingu við hliðarlínuna og endaði á þjálfara Spánverja í boðvangnum. Walker haltrar lítillega og Kieran Trippier er sendur að hita. Walker nær þó væntanlega að hrista þetta af sér.

Eftir hornspyrnu á varnarmaðurinn Robin Le Normand tilraun, tekur bakfallsspyrnu en langt frá því að hitta á rammann.

Jude Bellingham vann aukaspyrnu eftir brot Rodri. England náði að koma boltanum inn í teig Spánverja en dæmt sóknarbrot. Farið í Laporte. Hinumegin kemst Nico Williams svo í hættulega stöðu en Stones sýnir frábæran varnarleik og kemst fyrir tilraun Williams. Spánn fær hornspyrnu.

Eitt mest spennandi einvígið inni á vellinum í kvöld.

Spánverjar mun meira með boltann hérna í upphafi, án þess þó að hafa átt marktilraun. Leikurinn fer að mestu fram á vallarhelmingi Englands í byrjun.

Jude Bellingham komst í boltann eftir hornspyrnuna og Englendingar koma hættunni frá.

Spánverjar fá fyrstu hornspyrnu úrslitaleiksins. Nico Williams með fyrirgjöf inn í teiginn sem John Stones setur í horn.

Þvílík læti á Ólympíuleikvangnum, þvílík stemning. Vonandi fá áhorfendur hágæða skemmtun í kvöld.

Kobbie Mainoo með fyrstu spyrnu úrslitaleiksins!

Gunni Birgis og Freyr Alexandersson komu með innslag frá vellinum í Berlín ???????? pic.twitter.com/WPUSrFqLdc

— RÚV Íþróttir (@ruvithrottir) July 14, 2024

Veislan er að hefjast, þjóðsöngvarnir eru handan við hornið. Við minnum á að leikurinn er að sjálfsögðu sýndur beint á RÚV og hægt er að nálgast útsendinguna með því að smella hér. Höddi Magg og Kjartan Henry sem sjá um að lýsa.

Southgate nýtur enn stuðnings æðstu manna enska sambandsins sem vilja að hann stýri Englandi á HM 2026. Southgate ýjaði að því fyrir EM að hann þyrfti að láta af störfum ef England myndi ekki tryggja sér Evrópumeistaratitilinn. Þá fékk hann í upphafi móts gríðarlega harða gagnrýni frá stuðningsmönnum og sparkspekingum.

Southgate fékk hinsvegar hrós fyrir ákvaðarðanatökur sínar í sigrinum gegn Hollandi í undanúrslitum. Hann setti Ollie Watkins inn af bekknum og skoraði enski sóknarmaðurinn frábært sigurmark í lokin.

Southgate hefur áður stýrt Englandi í undanúrslitin á HM 2018, átta liða úrslit 2022 og í úrslitaleik EM 2020 þar sem liðið tapaði gegn Ítalíu í vítakeppni.

Það var ekki talin spennandi ráðning þegar Luis de la Fuente tók við spænska landsliðinu. Hann hafði stýrt U19 og U21 landsliði Spánar. En hann hefur svo sannarlega boðið upp á stórskemmtilegan fótbolta og þegar búinn að skila titli í hús. Spánn vann Þjóðadeildina á síðasta ári.

Olaf Scholz kanslari Þýskalands.

Hinn umdeildi forseti Ungverjalands er mættur í heiðursstúkuna. Er gríðarlegur fótboltaáhugamaður og ekkert óvænt að hann sé mættur.

Fótbolti.net sendir allra bestu afmæliskveðjur á Gunnar Birgisson íþróttafréttamann RÚV sem er staddur á leiknum í Berlín. Gunnar spáir veisluleik.

„Þetta verður úrslitaleikur sem verður lengi í minnum hafður, gæði gæði gæði. Ég sé fyrir mér Spánverjana komast yfir í tvígang en England jafnar í seinna skiptið á 90 mínútu. Yamal klárar dæmið í framlengingu," segir Gunnar sem spáir 3-2 sigri Spánar.

„Ég var að tala við Declan Rice og hann var að tala um hversu magnaður Lamine Yamal væri og sagði að það væri ótrúlegt að hugsa til þess að hann hafi bara verið tólf ára þegar Covid braust fram. Hann er svo ungur og hæfileikaríkur. Sem fótboltaáhugamaður er ég spenntur að sjá hann. Sem stuðningsmaður Englands er ég áhyggjufullur," segir enski íþróttafréttamaðurinn Henry Winter.

„Það fer eftir því hvort leikurinn verði spilaður á forsendum Spánverja eða Englendinga hvort þetta verði skemmtilegur leikur. Ef hann verður spilaður eftir forsendum Englendinga gæti hann verið þungur, hægur og leiðinlegur. Ég vona að Spánverjarnir nái að keyra upp hraðann og þá þurfa Englendingar að fylgja með. Þetta er besta liðið á móti því vinsælasta," segir Óskar Hrafn Þorvaldsson sem segist hægt að dást að andlegum styrk og þrautseigju Englendinga. Óskar er meðal sérfræðinga í beinni útsendingu á RÚV.

Luke Shaw kemur inn í byrjunarliðið í stað Kieran Trippier og byrjar sinn fyrsta leik á mótinu. Það er eina breytingin hjá Englandi og þýðir að fyrir aftan fyrirliðann Harry Kane eru áfram Jude Bellingham og Phil Foden. Bukayo Saka er hægri vængbakvörður og Marc Guehi is er í miðvarðalínunni með John Stones og Kyle Walker.

Hvað finnst Freysa um EM? Freyr Alexandersson og Gunni Birgis eru úti í Berlín fyrir úrslitaleik EM ???????? pic.twitter.com/q1vYa0kROI

— RÚV Íþróttir (@ruvithrottir) July 14, 2024

Dani Olmo sem er meðal markahæstu manna á EM með þrjú mörk er áfram í byrjunarliðinu og þá er Alvaro Morata klár í slaginn og byrjar. Lamine Yamal, sem hélt upp á sautján ára afmæli sitt í gær, byrjar.

Luis de la Fuente landsliðsþjálfari Spánar er ekkert að láta fólk bíða og er búinn að opinbera byrjunarlið sitt. Eins og margir bjuggust við gerir hann tvær breytingar frá sigrinum gegn Frakklandi í undanúrslitum. Robin Le Normand og Dani Carvajal voru í banni í þeim leik en koma báðir inn. Jesus Navas og Nacho Fernandez fara því á bekkinn.

Barist er um Henri Delaunay bikarinn sem er skírður eftir fyrsta framkvæmdastjóra UEFA, manninum sem fékk hugmyndina að Evrópumótinu. Hann lét lífið áður en fyrsta mótið var haldið 1960. Sonur hans, Pierre, hafði yfirumsjón með því að hanna bikarinn. Fyrir EM 2008 var bikarinn endurhannaður og stækkaður svo aðrir nýrri bikarar skyggðu ekki á hann.

BBC skoðaði nokkra lykilbardaga sem gætu ráðið úrslitum inni á vellinum í þessum spennandi úrslitaleik sem framundan er.

   12.07.2024 16:30

Fimm lykilbardagar í úrslitaleik EM á sunnudag

Eins og venja er þá eru mis getspök dýr látin spá fyrir um úrslit leikja á stórmótum í fótbolta.

Nú er það hinsvegar brasilíski kvenkyns tapírinn Khao Knong sem vekur mesta athygli. Hún er 21 árs og átta mánaða gömul og býr í dýragarði í Tælandi.

Hún hefur spáð fyrir um úrslitin í sjálfum úrslitaleiknum á sunnudag, viðureign Spánar og Englands.

Þjóðfánar beggja liða voru hengdir á tvær markstangir og hver um sig var með laufum og ýmsum ávöxtum. Khao Knong valdi að borða við spænska fánann og spáir þar með Spánverjum sigri.

Hlaðvarpsþáttur þar sem fréttamenn og sérfræðingar Fótbolta.net hita upp fyrir sjálfan úrslitaleikinn.

   11.07.2024 13:04

EM hringborðið - Efnilegar stórstjörnur og spennandi úrslitaleikur

England hefur ekki unnið stórmót í fótbolta síðan 1966. Kemur fótboltinn heim í kvöld?

   14.07.2024 11:00

Kane: Myndi skipta út öllu sem ég hef afrekað til að sigra

Það ríkir mikil eftirvænting í Berlín og sumir stuðningsmenn byrjuðu upphitun ansi snemma.

Spámenn Fótbolta.net eru Gunnar Birgisson og Jóhann Páll Ástvaldsson, íþróttafréttamenn á RÚV, en þeir hafa báðir verið frábærir í umfjöllun í kringum mótið. Valur Gunnarsson spáir fyrir hönd Fótbolta.net fyrir þennan úrslitaleik.

   14.07.2024 16:00

EM spáin - Hjartað segir England en heilinn segir Spánn

Dómari: François Letexier FRA
Aðstoðardómari 1: Cyril Mugnier FRA
Aðstoðardómari 2: Mehdi Rahmouni FRA
Fjórði dómari: Szymon Marciniak POL
VAR dómari: Jérôme Brisard FRA

   11.07.2024 10:42

Óvænt val á dómara í úrslitaleiknum

Heil og sæl! Hér fylgjumst við með úrslitaleik Spánar og Englands á Evrópumótinu í fótbolta en leikið er á Ólympíuleikvangnum í Berlín.

Þetta er sögufrægur leikvangur sem var reistur í tilefni Ólympíuleikana þar í borg 1936 en Adolf Hitler fyrirskipaði að reistur yrði nýr leikvangur. Árin 2000-2004 fóru fram viðamiklar breytingar og endurnýjun. Nýtt þak var sett upp allan hringinn.

Leikið var á vellinum á HM 2006. Þar fór meðal annars fram úrslitaleikur Ítalíu og Frakklands þar sem Ítalía vann eftir vítaspyrnukeppni.