Ísland vinnur Svartfjallaland með tveimur mörkum gegn engu hér á Laugardalsvelli! Við verðum með viðtöl síðar í kvöld.

Hulda Geirsdóttir er búin að telja.

Svarið við því er hinsvegar nei að svo stöddu.

Ísak Bergmann vinnur horn fyrir Ísland. Skildi þó ekki vera að við fengjum þriðja markið eftir horn?

Logi með bolta inn á teig sem Willum Þór virðist fá óvænt í sig og í fangið á Milan Mijatovic.

Hrikaleg mistök í öftustu línu Svartfjallalands sem senda boltann beint í fætur Willums Þórs sem tekur þá á rás í átt að marki og lætur vaða en Milan Mijatovic sér við honum. Þarna var kjörið tækifæri á að reka síðasta naglann í þennan leik.

Willum Þór kemur sér í skotfæri en skotið yfir markið.

Íslenska liðið að komast í flotta stöðu en aðeins of fastur bolti í hlaupið á Arnór Sig frá Andra Lucas en Arnór Sig gerir vel og rennir sér á boltann og vinnur horn. Við náum hinsvegar ekkert að nýta okkur hornið að neinu ráði.

Driton Camaj sterkari en Hjörtur Hermannsson sem missti fæturnar aðeins þegar þeir sparka báðir í boltann og Driton Camaj fær frábært færi einn á Hákon Rafn og lætur vaða en Hákon Rafn vandanum vaxinn og ver þetta virkilega vel.

Íslenska lið oft að komast í ágætis stöður en eru full seinir að hreyfa boltann og mómentið fer frá þeim.

Hákon Rafn fær aðeins að vera með. Driton Camaj með léttan æfingarbolta á hann rétt til að halda honum heitum.

Driton Camaj kemst í skotfæri en skotið hátt yfir.

Jóhann Berg að komst í flotta stöðu og kemur með sendingu fyrir markið sem Mikael Anderson er að mæta á en Milan Mijatovic grípur inn í á síðustu stundu.

Bæði mörk Íslands komið eftir horn og líklega fáir jafn ánægðir að sjá þetta og Sölvi Geir Ottesen sem nýlega kom inn í starfslið KSÍ til að vinna í nákvæmlega þessu ásamt öðru.

Nikola Krstovic með tilraun sem fer beint á Hákon Rafn í marki Íslands sem ver þetta.

Jóhann Berg með skot sem fer af varnarmanni og rétt framhjá.

Jón Dagur hleypur á vörn Svartfellinga og er stöðvaður.

Willy Delajod dómari gefur merki um ekkert. Orri Steinn stígur líklega á boltann og misstígur sig við það.

Orri Steinn fer niður í teignum.. VAR?

Íslenska liðið að fá horn. Þau hafa verið að skapa ursla fyrir Svartfellinga.

Íslenska liðið fær tvö færi til að skora en Novica Erakovic hendir sér fyrir og fær hann í hendina að mati dómara en eftir VAR athugun er þetta allt tekið tilbaka. Hjörtur Hermanns og Orri Steinn í færunum.

Orri Steinn vinnur hornspyrnu fyrir Ísland. Væri fínt að endurtaka leikinn frá því í fyrri.

Kraftur í Íslandi í upphafi síðari.

Vladimir Jovovic sparkar síðari hálfleiknum af stað.

Og Gummi spjallaði við hann.

   06.09.2024 19:21

„Kannski sjáum við Gylfa aftur á Englandi"

Það er Íslenska liðið sem leiðir hérna í hálfleik. Óhætt að segja að það sé bara nokkuð sanngjarnt. Tökum okkur stutta pásu og snúum svo aftur með síðari hálfleikinn.

Þetta virkar allt voðalega hægt og erfitt hjá Íslenska liðinu.

Vladimir Jovovic reynir að hlaða í sleggju en boltinn fer hátt yfir.

Fyrirgjöf fyrir mark Íslands og Milutin Osmajic á skalla sem Hákon Rafn grípur nokkuð þægilega.

Íslenska liðið að komast í flotta stöðu en Mikael Anderson með misheppnaða fyrirgjöf fyrir markið.

Svartfellingar að þræða Nikola Krstovic í gegn en Hjörtur Hermannsson heldur vel í við hann og nær að blokka.

Logi Tómasson full gíraður með hlaup upp vinstri en missir boltann aðeins of langt frá sér og Svartfellingar koma boltanum burt.

Gylfi Þór tekur spyrnuna sem er slök og beint í varnarvegginn.

Við finnum Orra Stein í teignum sem reynir að skila boltanum lúmskt fyrir fætur Gylfa Þórs en Svartfellingar lesa það og koma boltanum frá.

Svartfellingar finna Vladimir Jovovic á teignum og hann reynir að tía upp liðsfélaga í skot en Stefán Teitur kemst fyrir og sparkar boltanum frá.

Logi Tómasson í smá brasi þegar hann hitti ekki boltann og Milutin Osmajic komst í óvænt skotfæri en skaut í hliðarnetið!

Íslenska liðið leitar leiða í kringum þéttan Svartfellskan múr.

Klafs á teignum eftir hornið en enginn nær að koma boltanum á markið og Svartfellingar fá á endanum aukaspyrnu.

Virkilega skemmtilega spilað hjá Íslandi en fyrirgjöfin hjá Mikael Anderson ekkert sérstök en vinnur þó horn.

Risto Radunovic sparkar Mikael Anderson niður sem er ekki ánægður með Svartfellinginn og lætur hann alveg vita af því.

Stúkurnar eru byrjaðar að kalla á milli.

Jón Dagur reynir fyrirgjöf fyrir markið en Marko Tuci kemst fyrir.

Þetta er að bresta á! Mikil stemning hjá Svartfjallalandi í stúkunni.

Sama hvað fólki finnst um Þjóðadeildina þá er Þjóðadeildarlagið stórkostlegt #fotboltinet pic.twitter.com/LpgRhL1USK

— Elvar Geir Magnússon (@elvargeir) September 6, 2024

Guðlaugur Victor og Arnór Ingvi höfðu verið að glíma við meiðsli í aðdraganda leiksins en þetta kom fram í viðtali við Davíð Snorra Jónasson aðstoðarlandsliðsþjálfara á Stöð 2 Sport. Þeir eru óvænt báðir meðal varamanna í kvöld.

Sæbjörn Steinke: 3-1 fyrir Ísland. Guðmundur Aðalsteinn: 3-0, Ísland. Orri Steinn fagnar félagaskiptunum til Sociedad með tveimur mörkum. Gylfi setur svo hitt markið beint úr aukaspyrnu. Þægilegur dagur á skrifstofunni. Tómas Þór: 2-1 Elvar Geir: 2-2, mjög Þjóðadeildarleg úrslit fyrir Ísland. Haukur Gunn: 3-1 Stefán Marteinn: 1-0

Þjálfari Svartfellinga, Robert Prosinecki, sagði á fréttamannafundi í gær að Ísland væri með veikleika sem hans lið ætli að nýta sér. Hann greindi þar frá því að stærsta nafn liðsins, Stevan Jovetic, myndi byrja á bekknum. Þessi 34 ára sóknarmaður lék á sínum tima með Manchester City, Fiorentina og Inter en er nú án félags. Hann var síðast leikmaður Olympiakos í Grikklandi og kom inn af bekknum þegar liðið vann Fiorentina 1-0 í úrslitaleik Sambandsdeildarinnar fyrr á árinu. Hann á að baki 78 landsleiki og hefur í þeim skorað 36 mörk. „Við þurfum að fara varlega með hann, hann hefur ekki spilað síðan gegn Georgíu í júní. Við eru með áætlun fyrir hann og þurfum að hafa í huga að við mætum Wales þremur dögum eftir leikinn gegn Íslandi. Það þarf ekki að ræða um hversu mikilvægur hann er fyrir okkur en við spörum hann fyrir leikinn gegn Wales," sagði Prosinecki. „Það er langt síðan hann spilaði síðast og hann er ekki í sömu leikæfingu og aðrir í liðinu." Prosinecki hefur skoðað síðustu landsleiki Íslands og segist sérstaklega hafa rýnt í umspilsleikinn gegn Úkraínu. „Við greindum þá vel, þeir áttu flotta kafla gegn Úkraínu en eru með veikleika sem við vonumst til að geta afhjúpað. Þeir hafa lent í meiðslum. Þeir eru klárlega með mjög gott lið og við berum virðingu fyrir þeim en getum ógnað þeim. Þetta verður vafalaust áhugaverður leikur."

Landsliðsþjálfarinn Age Hareide er búinn að velja byrjunarliðið sitt. Frá síðasta landsleik, vináttuleiknum gegn Hollandi í júní, eru sjö breytingar. Alfons Sampsted, Hjörtur Hermannsson, Daniel Leó Grétarsson, Logi Tómasson, Stefán Teitur Þórðarson, Orri Steinn Óskarsson og Gylfi Þór Sigurðsson koma inn. Hákon Rafn Valdimarsson, Jóhann Berg Guðmundsson, Jón Dagur Þorsteinsson og Mikael Neville Anderson halda sæti sínu í liðinu. Það vekur athygli að þeir Guðlaugur Victor Pálsson og Arnór Ingvi Traustason eru ekki í liðinu - eru á bekknum. Arnór var ekki með Norrköping í síðasta leik og Guðlaugur Victor hefur verið að glíma við meiðsli. Sverrir Ingi Ingason og Hákon Arnar Haraldsson meiddust í aðdraganda leiksins. Alls eru þetta fjórir leikmenn sem hafa verið í sterkasta byrjunarliði Íslands. Orri Steinn fær þá traustið í fremstu línu á kostnað Andra Lucasar sem er á bekknum. Gylfi Þór Sigurðsson er með Orra í fremstu línu.

Það var mikið húllumhæ að vanda á Ölveri fyrir leikinn. Tómas Þór og Age Hareide skemmtu viðstöddum og sá norski afhjúpaði byrjunarlið sitt fyrir kvöldið.

Þó Þjóðadeildin hafi gefið íslenska landsliðinu tækifæri á að komast á stórmót í gegnum umspil þá hafa strákarnir okkar enn ekki unnið leik í keppninni. Sögulegur sigur San Marínó á Liechtenstein í gær gerði það að verkum að Ísland er eina þjóðin sem hefur ekki unnið leik í Þjóðadeildinni síðan keppnin var sett á laggirnar 2018. Lesendur Fótbolta.net búast við því að það breytist í kvöld og sigur vinnist á Svartfellingum. Tæplega 73% spá íslenskum sigri.

„Í Reykjavík eigum við möguleika gegn hvaða liði sem er," sagði Age Hareide, landsliðsþjálfari Íslands, á fréttamannafundi í gær. „Svartfjallaland er með gott lið, týpískt lið frá Balkanskaganum. Þeir eru líkamlega sterkir og með góða sóknarmenn. (Stefan) Jovetic er enn lykilmaður og hann hefur verið það í mörg ár. Hann spilar vel. Við þurfum að eiga okkar besta leik en við höfum sýnt að við getum strítt hvaða liði sem er," sagði Hareide á fundinum. „Það er mikilvægt að ná góðum úrslitum því við förum næst til Tyrklands og það verður erfiður leikur. Við höfum sýnt að við getum alltaf spilað vel og náð góðum úrslit, við stefnum á það." Jóhann Berg Guðmundsson, fyrirliði Íslands, sat einnig fundinn. Hann segir að nýtt tímabil sé að byrja. „Ég vona innilega að nú séu bjartari tímar. Við erum lítil þjóð og þetta verður upp og niður. Það þarf allt að smella svo við komumst á stórmót. Vonandi erum við á réttri leið og mér finnst við vera að finna hvernig við viljum spila, leikmenn eru að komast í stærri lið og taka meiri ábyrgð inni á vellinum. Þetta er á réttri leið, klárlega, en það þarf allt að smella." „Núna er nýtt tímabil að byrja hjá okkur og Þjóðadeildin hefur gefið okkur tvo leiki þar sem við vorum gríðarlega nálægt því að komast á stórmót. Það verður að bera fulla virðingu fyrir þessari keppni. Vonandi getum við staðið okkur vel og yngri leikmenn haldið áfram að taka stærri hlutverk, til að leiða okkur á enn eitt stórmótið," sagði Jóhann Berg.

   03.09.2024 12:46

Landsliðshópur Svartfellinga: Savic ekki með og Jovetic án félags

   05.09.2024 10:00

Svartfellingar syrgja markvörðinn Matija Sarkic

   05.09.2024 08:30

„Fékk að reykja í sturtuklefanum því hann var snillingur“

„Það er mjög mikilvægt að ná góðum árangri í Þjóðadeildinni," segir Andri Lucas Guðjohnsen sóknarmaður íslenska landsliðsins. Framundan er þessi leikur í kvöld og svo er útileikur gegn Tyrklandi á mánudag. Hvernig líst Andra á þessa leiki? „Bara frekar vel. Það er alltaf gaman að hitta strákana og sérstaklega gaman að spila hérna heima. Þetta eru tveir mikilvægir leikir þar sem við ætlum okkur að ná í sex stig." Ísland hefur tvisvar komist í umspil í gegnum Þjóðadeildina og þannig fengið tækifæri til að komast á stórmót. Við höfum því fengið að kynnast hvaða möguleikum keppnin hefur upp á að bjóða. „Við höfum séð hvað Þjóðadeildin getur gert fyrir okkur. Við fengum þessa umspilsleiki til dæmis síðast til að koma okkur á EM. Við náðum því miður ekki að nýta okkur þá," segir Andri. Ísland vann England á Wembley í vináttulandsleik í síðasta glugga. Andri segir að ýmislegt sé hægt að taka út úr þeim leikjum. „Það sást þar að þegar við spilum saman og erum þéttir varnarlega, þorum að spila, þá erum við mjög öflugir. Við erum með góða leikmenn sem hafa verið að fara til stórra liða í Evrópu"

   03.09.2024 16:40

Andri Lucas: Fótboltinn getur verið geggjaður og þetta er dæmi um það

Sverrir Ingi Ingason þurfti að draga sig úr upprunalega hópnum vegna meiðsla. Það munar um minna því við Íslendingar eigum ekki mikið úrval af varnarmönnum því miður. Júlíus Magnússon kom á endanum inn í hópinn í stað Sverris en hann er miðjumaður. Á miðvikudagskvöld var svo tilkynnt að Hákon Arnar Haraldsson þyrfti að draga sig úr hópnum vegna meiðsla. Ekki hefur verið kallaður inn leikmaður í staðinn.

Franski dómarinn Willy Delajod mun dæma leikinn í kvöld. Delajod er 31 árs en byrjaði 13 ára gamall að dæma fótboltaleiki. Hann byrjaði að dæma í efstu deild Frakklands 2018, 25 ára gamall, og varð yngstur til að dæma í deildinni. Allt dómarateymið í kvöld kemur frá Frakklandi, aðstoðardómarar verða Erwan Finjean og Philippe Jeanne. Fjórði dómari verður Marc Bollengier og VAR dómari Benoît Millot.

Ísland er í riðli með Svartfjallalandi, Tyrklandi og Wales í B-deild Þjóðadeildarinnar og hefur keppni gegn Svartfjallalandi á Laugardalsvelli í kvöld! Eins og við þekkjum þá mun það lið sem vinnur riðilinn fara upp í A-deild og neðsta liðið falla niður í C-deild. Breytt fyrirkomulag tekur gildi hvað varðar 2. og 3. sætið. Þau lið sem þar enda fara í umspilseinvígi: Ef Ísland endar í öðru sæti fer það í umspil (heima og að heiman) við lið úr A-deild þar sem keppt er um sæti í A-deildinni. Ef Ísland endar í þriðja sæti fer það í umspil (heima og að heiman) við lið úr C-deild þar sem keppt er um sæti í B-deildinni. Það lið sem tapar verður í C-deildinni næst. Þessi útgáfa Þjóðadeildarinnar tengist HM 2026 og gefur möguleika á að tryggja sér þátttökurétt þar í gegnum umspil. Leikir Íslands Ísland - Svartfjallaland föstudaginn 6. september Tyrkland - Ísland mánudaginn 9. september Ísland - Wales föstudaginn 11. október Ísland - Tyrkland mánudaginn 14. október Svartfjallaland - Ísland laugardaginn 16. nóvember Wales - Ísland þriðjudaginn 19. nóvember