Í dag var fjallað um það í svartfellskum miðlum að varnarmennirnir Stefan Savic og Igor Vujacic myndu ekki ferðast til Íslands og verða því ekki með landsliðinu í leik liðanna í Þjóðadeildinni.

Savic, sem er fyrrum leikmaður Manchester City, glímir við meiðsli og Vujacic, sem er leikmaður Rubin Kazan, er einnig fjarri góðu gamni.

Ísland tekur á móti Svartfjallalandi á föstudag í fyrsta leik Þjóðadeildarinnar. Stærsta stjarnan í liði Svartfellinga er Stefan Jovetic sem lék á sínum tima með Manchester City. Hann er 34 ára og var síðast leikmaður Olympiakos í Grikklandi. Hann á að baki 78 landsleiki og hefur í þeim skorað 36 mörk.

Tveir leikmenn sem gætu mætt Víkingi í riðlakeppni Sambandsdeildarinnar eru í hópnum. Það eru þeir Marko Vukcevic hjá Borac og Novica Erakovic hjá Omonia Nicosia.

Adam Marusic, leikmaður Lazio, er næst landsleikjahæstur á eftir Jovetic með 59 leiki spilaða.