SKÝRSLAN: Bolvíkingurinn sá um Vestra
Hvað réði úrslitum?
Í kaflaskiptum leik náðu Stjörnumenn að nýta sína góð kafla betur, bæði lið áttu skot í rammann og hefðu mörkin hæglega getað orðið fleiri. Stjörnumenn sigldu þessu heim á endanum með því að spila fótbolta sem þeir eru ekki þekktir fyrir en það dugði til og stigin þrjú því þeirra.
Bestu leikmenn
1. Andri Rúnar Bjarnason (Stjarnan)
Í leik þar sem enginn bar af eitthvað sérstaklega er alltaf þægileg að leita í mennina sem skora mörkin. Hefur verið gríðarlega öflugur upp á síðkastið og gefur liðinu mikið sem uppspilspunktur og sér til þess að liðið geti stigið ofar á völlinn á meðan hann djöflast í miðvörðum andstæðingsins. Skoraði svo tvö góð mörk sem er auðvitað hans hlutverk.
2. Ágúst Eðvald Hlynsson (Vestri)
Besti maður Vestra í dag alveg klárlega. Hleypur endalaust ásamt því að vera ofboðslega góður í fótbolta. Kemur liðsfélögum sínum í góðar stöður ásamt því að vera óhræddur við að láta vaða sjálfur. Lagði upp markið á Anton Kralj og markið sem var dæmt af þeim.
Atvikið
Ívar Orri og hans teymi ákveða að dæma jöfnunarmark af Vestra sem ég bara get ekki með nokkru móti séð að hafi verið réttur dómur. Eftir að hafa horft margoft á endursýninguna held ég að þar hafi verið um stór mistök að ræða
Hvað þýða úrslitin?
úrslitin þýða það að Stjörnumenn fara upp í 31 stig og halda fjórða sætinu. Vestramenn þurfa að bíða og sjá hvort að þeir haldi fimmta sætinu, með sín 25 stig, en Fram á leik inni á þá og með sigri í honum fara þeir upp fyrir Vestra.
Vondur dagur
Sergine Fall gefur Stjörnumönnum jöfnunarmarkið og fyrir það fær hann að eiga þennan dálk í dag. Vestramenn eru þekktir fyrir það að það er erfitt að lenda undir á móti þeim þar sem þeir eru svo gríðarlega öruggir í sínum varnarleik og líður vel inni í eigin teig. Ef og hefði og allt það en mörk breyta leikjum og því var þetta agalega svekkjandi fyrir Vestramenn.
Dómarinn - 5
Það er mikil synd að þessi ákvörðun að dæma mark af Vestra hafi verið tekin vegna þess að Ívar Orri og félagar voru heilt yfir bara mjög flottir í leiknum. Línan var skýr og leikurinn fékk að flæða vel, Ívar var greinilega búinn að ákveða að leyfa hörku sem er vel. Sleppi honum við falleinkunn en atvikið er það stórt að mínusinn verður meiri.