Þannig fór um sjóferð þá. Víkingar úr leik í Meistaradeildinni og einvígi gegn Thun frá Sviss bíður í Evrópudeildinni.

Dæminu snúið við og brot dæmt á Svein Margeir.

Síðasti möguleiki Víkinga fauk þarna.

VAR er að skoða þetta

Sveinn Margeir fyrstur á lausan bolta í teignum og á honum er brotið að mati dómara!

Uppbótartíminn er alls fjórar mínútur

Aukaspyrna frá Gylfa inn á teiginn, Sveinn Gísli rís hæst en hittir ekki á markið.

Ahmad sleppur einn innfyrir og klárar vel fram hjá Aroni. Klár rangstaða á myndum og er dæmd en er samt skoðað.

VAR staðfestir dóminn á vellinum

Sveinn Gísli fer í bakvörðinn og Helgi stígur upp, Daði og Viktor inn á miðjuna

Hapoel að taka öll völd

Kangwa aleinn í teignum en skýtur yfir markið úr úrvalsfæri.

Vikingar þurfa að finna orku og það strax.

Kings Kangwa með gott hlaup af miðjunni beint í hjartað og nær skoti en setur boltann framhjá.,

Javon East í hörkufæri í teignum úti til hægri eftir góða sókn en Aron ver

Ventura í dauðafæri nánast á vítapunkti en skóflar boltanum vel yfir markið.

Vandræði í teig Víkinga eftir fyrirgjöf frá Kangwa, boltinn skoppar manna á milli en er að endingu hreinsað frá.

Leikurinn stopp vegna höfuðmeiðsla, Aron Elís og Rotman skalla saman og finna báðir fyrir því.

Helgi með frábæra tæklingu í teignum eftir lúmska sendingu inn á teiginn.

Flaggið fer þó líka á loft svo það hefði ekki talið.

Fyrsta hornspyrna hálfleiksins er heimamanna.

Hapoel byrjar á snöggri sókn. Boltinn fyrir markið á Kings sem fær boltann augljóslega í höndina og aukaspyrna réttilega dæmd.

Hapoel liðar sparka okkur af stað á ný.

Flautað til hálfleiks í Ungverjalandi. Staðan markalaus og satt að segja þó ég sé nú ekki hlutlaus þá hafa Víkingar einfaldlega verið betri.

Vonumst eftir því sama í síðari hálfleik

Uppbótartími fyrri hálfleiks er að lágmarki fjórar mínútur.

Hapoel að fá aukaspyrnu á góðum stað til fyrirgjafar úti til hægri.

Gunnar Vatnhamar brotlegur.

Karl Friðleifur með tæpan skalla til baka á Aron Snæ, sóknarmaður við það að komast í milli en Ekroth og Aron bjarga þessu í sameiningu.

Igor Zlatanovic stígur undir Gunnar Vatnhamar eftir hornið og lendir Gunnar illa. Aukaspyrna dæmd en það látið duga.

Hapoel fær sína fyrstu hornspyrnu í leiknum

Þeir eru sömuleiðis að undirbúa skiptingu.

Sveinn Margeir í baráttu í teignum eftir langt útspark. Vitor aðeins að knúsa hann en ekki nóg

Gylfi með spyrnuna inn á teiginn en heimamenn koma boltanum út fyrir.

Víkingar fá horn í kjölfarið. Þeirra fjórða í leiknum

Stígur stígur Ventura út á miðjum vellinum og sækir góða aukaspyrnu fyrir Víking.

Gylfi Þór með klobba á miðjum vellinum og Víkingar 4 á 1. Sending Gylfa við vítateiginn léleg en Sveinn Margeir vinnur boltann sem fer af varnarmanni hárfínt framhjá.,

Valdimar Þór í góðri stöðu úti til vinstri með tvo inn á teignum. Setur boltann yfir á fjærstöng en of mikið púður og boltinn afturfyrir.

Kangwa í tómu tjóni í eigin teig undir pressu frá Daníel, boltinn á Aron Elís sem nær skoti sem Ofir slær í horn.

Áhyggjuefni að Víkingar hafa þurft að nýta 2 af 3 stoppum til skiptinga á fyrsta korteri leiksins.

Kings Kangwa hársbreidd frá því sleppa innfyrir en missir boltann of langt frá sér og fer afturfyrir.

Lúmskur bolti fyrir markið frá Javon East sem Aron Snær sópar upp.

Tarik fer af velli á börum. Sveinn Margeir að gera sig til í að koma inn í hans stað.

Tarik fer niður eftir samstuð á vellinum og virðist þó nokkuð þjáður. Pressaði vel á Vitor fyrirliða Hapoel sem fylgir vel á eftir og stígur á fótinn á Tarik sem hefur lokið leik,

Því miður lítur þetta út eins og alvarleg meiðsli en Tarik rís þó á fætur.

Hapoelliðar koma sér inn á teiginn vinstra megin, boltinn fyrir markið en Ekroth mættur og hreinsar frá.

Helgi Guðjóns sækir horn strax á fyrstu mínútu. Hafsentar Víkings rölta inn á teiginn.

Þeta er farið af stað í Ungverjalandi. Það eru Víkingar sem hefja hér leik

Það er góð stemning á pöllunum upphitun búin og næst... GAME TIME! TAKK ?????? pic.twitter.com/EdPG1f09nj

— Víkingur Fótbolti (@vikingurfc) July 29, 2026

Nikolaj Hansen er í fullum skrúða hjá Víkingum í dag í búning og skóm en hefur engan þátt tekið í upphitun með liðinu. Hann hefur ekki getað æft undanfarna daga og verður að teljast ólíklegt að hann sé leikfær.

Sölvi Geir Ottesen, þjálfari Víkings, gerir eina breytingu á byrjunarliði sínu frá fyrri leiknum.

Nikolaj Hansen skoraði bæði mörk Víkings fyrir viku síðan en hann er á bekknum vegna ökklameiðsla. Hann kom ekki við sögu í 5-1 sigri Víkings gegn Keflavík síðastliðinn föstudag.

Aron Elís Þrándarson leiðir línuna í hans fjarveru. Tarik Ibrahimagic kemur þá inn í liðið og verður á miðjunni.

Stuðningsmenn Víkings eru vanir að fjölmenna á Ölver í Glæsibæ þegar lið þeirra leikur utan landsteinana og þessi leikur verður engin undantekning. Það verður væntanlega líf og fjör á staðnum þar sem einnig verður upphitun fyrir toppslag Þróttar og Aftureldingar í Lengjudeildinni sem fram fer 19:45 í kvöld.

Dómarateymi leiksins kemur frá Bosníu en aðaldómari verður Antoni Bandic sem hefur verið að klifra upp metorðastigann hjá UEFA. Bandic hefur áður dæmt leik hjá íslenskum liðum og dæmdi meðal annars 2-2 jafnteflisleik Íslands og Wales í Þjóðadeildinni 2024.

VAR dómari leiksins er hinsvegar ítalskur, Gianluca Aureliano.

Líkt og gegn Györ fyrir hálfum mánuði er Fótbolti.net að sjálfsögðu með mann á staðnum. Ívar Björgvinsson fylgdi Víkingum til Ungverjalands að þessu sinni og hefur rætt við menn undanfarna daga og má sjá afrakstur þess hér að neðan.

Vegna ástandsins fyrir botni Miðjarðarhafs fá lið frá Ísrael ekki að leika evrópuleiki sína í heimalandinu. Leikurinn fer því fram í Ungverjalandi sem ætti að reynast Víkingum ágætt enda farnir að venjast landinu,

Haladás Stadium er leikvangur kvöldsins. Völlurinn er frekar nýlegur og opnaður árið 2017 og tekur alls 8.903 áhorfendur í sæti. Ég ætla að leyfa mér að efast um að það verði uppselt þó á leik kvöldsins.

Heil og sæl kæru lesendur og verið hjartanlega velkomin í þessa beinu textalýsingu Fótbolta.net frá leik Hapoel Be'er Sheva og Víkings í 2. umferð forkeppni Meistaradeildar Evrópu.

Um er að ræða síðari leik liðanna en Víkingur fór með 2-1 sigur af hólmi á heimavelli fyrir rúmri viku og er því í fínum möguleika að tryggja sig áfram í 3. umferð forkeppninar í dag.