Moyes náði ekki að klára heilt tímabil með Manchester United og þá var hann einungis eitt ár í starfi hjá Real Sociedad á Spáni áður en hann tók við Sunderland þar sem hann var innan við ár við stjórnvölinn áður en hann var rekinn eftir fall í vor.

„Það var bara í síðasta starfi (hjá Sunderland) sem mér fannst þetta ekki vera gott skref og ég naut þess ekki að vera þar. Ég er hungraður í að gera rétta hluti núna," sagði Moyes.

„Ég veit ekki um neinn stjóra sem hefur ekki farið í gegnum neikvæð tímabil, sérstaklega eins og leikurinn er í dag. Ég vona að þetta gefi mér mikinn styrk og skilning á því sem ég þarf að gera."

„Einbeitingin er algjörlega á því sem gerist frá og með núna og út tímabilið. Það fyrsta sem þarf að gera er að vinna næsta leik og byggja ofan á það. Ég er viss um að við verðum í betri stöðu áður en langt um líður."