Í leik milli Torpedo Vladimir og Tekstilshchik Ivanovo braut markvörður Ivanovo á sóknarmanni innan vítateigs. Dómarinn taldi þó að brotið hafi verið fyrir utan teig og dæmdi ranglega aukaspyrnu.

Lýsandinn Vladimir Nikolsky varð svo reiður yfir þessari ákvörðun að hann lét gamminn geysa og hraunaði yfir gæðin í dómgæslunni. Hann sagði að dómarinn væri skömm fyrir fótboltann áður en hann gekk út.

Í viðtali við rússnesku sjónvarpsstöðina RT sagðist Nikolsky ekki sjá eftir gjörðum sínum.

Hann er starfsmaður Torpedo Vladimir en félagið er í rússnesku C-deildinni. Þar eru reglur um að félögin sjái sjálf um útsendingar frá heimaleikjum sínum. Það gerir að verkum að sjónvarpsfyrirtæki þurfa ekki að ferðast langar vegalengdir um Rússland og þá hafa ástríðufullar lýsingar stuðlað að betra áhorfi.

Forseti Torpedo Vladimir kemur Nikolsky til varnar og hefur ekki farið fram á afsökunarbeiðni.

„Hann er ekki bara starfsmaður félagsins, hann er líka stuðningsmaður eins og ég. Nikolsky gerði allt rétt. Félagið og stuðningsmenn standa með honum," segir forsetinn, Valery Puzanov.