Ensk lögregluyfirvöld gáfu í gærkvöldi frá sér yfirlýsingu þess efnis að öryggisgæsla í kringum úrslitaleik enska bikarsins verði hert til muna í ljósi atburða mánudagskvöldsins.

Í yfirlýsingunni kom meðal annars fram að fjölgað verði talsvert vopnuðum lögreglumönnum í námunda við leikvanginn sem og í stúkunni.

Allt eru þetta varúðarráðstafanir vegna hryðjuverkaárásarinnar sem átti sér stað í Manchester á mánudagskvöldið, þegar að sjálfsmorðssprengjuárás var gerð á tónleikum hjá Ariana Grande. 22 létu lífið og að minnsta kosti 59 særðust.

Það eru Arsenal og Chelsea sem leika til úrslita á Wembley á laugardaginn og hefst leikurinn klukkan 16:30.