Stjarnan tapaði fyrri leiknum 3-0 en Ólafur Karl segir að ekki sé öll nótt úti enn. ,,Við ætlum að reyna, það sakar ekki. Fólk má alveg hlægja af því ef það vill," sagði Ólafur Karl.

Nemanja Vidic, varnarmaður Inter, var ekki sáttur eftir fyrri leikinn þar sem Ólafur Karl tók myndband af honum í tengslum við lyfjapróf eins og kom fram í viðtali eftir leik.

,,Fólk sem heldur að ég hafi tekið þetta í miðju lyfjaprófi er eitthvað að misskilja hlutina. Við vorum að bíða eftir að fara í lyfjapróf og sátum í dómaraklefa saman."

Ólafur Karl deildi myndbandinu á snapchat en hann útilokar ekki að taka aftur upp skot af Vidic annað kvöld. ,,Ég ætla að vera með alvöru kameru og taka aftur upp núna, í stað þess að taka upp á símann," sagði Ólafur Karl léttur í bragði.

,,Ég vona innilega að þetta hafi lekið í ítalska fjölmiðla og það verði baulað á mig á San Siro. Það er draumurinn."