Ranieri skrifaði undir þriggja ára samning síðasta sumar og heldur Daily Mail því fram að meðal samningsákvæða hafi verið 5 milljónir punda fyrir Englandsmeistaratitil.

Ranieri og umboðsmaður hans kröfðust þess að það yrðu samningsákvæði sem myndu verðlauna hann tækist félaginu að næla sér í evrópudeildar- eða meistaradeildarsæti eða landa afar ólíklegum, jafnvel ómögulegum, Englandsmeistaratitli.

Heimildarmenn Daily Mail segja að Ranieri fái 100 þúsund pund fyrir hvert sæti fyrir ofan fallsvæðið og bætast þær bónusgreiðslur ofan á titilgreiðsluna, þannig að Ítalinn ætti að fá um 6.7 milljónir fyrir árangurinn.

Ranieri er í óformlegum samningsviðræðum við Leicester og segir þessi 64 ára gamli þjálfari að Leicester gæti verið hans síðasta félag á ferlinum.

„Ég er ánægður hér og hugsa ekki um annað en Leicester. Ég held að Leicester verði mitt síðasta félag og ég vona að ég fái sex eða sjö ára samning og fái að ljúka ferlinum hér."