Einn leikur var á dagskrá í Pepsi-deild kvenna í dag en það var viðureign Fylkis og KR á Floridana vellinum í Árbænum.

KRingar voru á botninum fyrir leikinn án stiga, aðeins búnir að skora eitt mark.

Það voru hinsvegar stelpurnar úr Vesturbænum sem sem komust yfir á 27. mínútu þökk sé glæsilegu marki Sigríðar Maríu Sigurðardóttur, stöngin inn.

Forystan var tvöföld aðeins þremur mínútum síðar þegar Hólmfríður Magnúsdóttir slapp ein í gegn og vippaði yfir Ástu Vigdísi í marki Fylkis, 0-2.

Heimamenn minnkuðu muninn fyrir hálfleik en þar var á ferðinni Jesse Shugg en KRingar voru ekki búnir.

Hólmfríður Magnúsdóttir skoraði sitt annað mark og þriðja mark KR eftir rúman klukkutíma leik eftir hornspyrnu en þetta var hennar fyrsti byrjunarliðsleikur í sumar.

Fleiri urðu mörkin ekki og fyrsti sigur KR í sumar staðreynd. KR fer því upp fyrir Hauka í 9. sætið en Fylkir er áfram í 8. sæti með fjögur stig.