SKÝRSLAN: Selfoss hafði betur í uppgjöri vonbrigðaliðanna
Hvað réði úrslitum?
Þetta var alls ekki fjörugur leikur og það er í raun ótrúlegt að mörkin hafi verið þrjú. Selfoss spilaði flottan varnarleik eftir seinna mark sitt og gaf Stjörnunni nánast engin færi til að skora.
Bestu leikmenn
1. Jimena Lopez (Selfoss)
Var virkilega öflug í vinstri bakverðinum. Hún hljóp milkið og skoraði sigurmarkið með flottum skalla.
2. Áslaug Dóra Sigurbjörnsdóttir (Selfoss)
Var að spila mjög vel í vörn Selfyssinga í leiknum, hún og Sif voru flottar í hjarta varnarinnar. Svo var Barbára mjög frísk í fremstu víglínu á meðan hún var inn á.
Atvikið
Þetta var leikur fárra atvika. Sigurmarkið sem Selfoss skorar er atvik leiksins. Það voru svo fá færi í leiknum og það var frábært fyrir heimakonur að ná að nýta þetta færi til að skora sigurmarkið.
Hvað þýða úrslitin?
Selfoss vinnur sinn fyrsta leik í meira en mánuð og kemur sér nálægt liðunum fyrir ofan, en þær eru bara einu stigi frá öruggu sæti núna. Þessi sigur gæti gefið þeim mikið sjálfstraust. Það er ansi dauft yfir Stjörnunni og þær eru ansi langt frá markmiði sínu - að vinna Íslandsmeistaratitilinn.
Vondur dagur
Eyrún Embla Hjartardóttir var klaufaleg í fyrsta marki leiksins en svo verða sóknarleikmenn Stjörnunnar að fara að rífa sig í gang. Níu mörk í níu leikjum er alls ekki gott, en xG tölfræðin segir að þær eigi að vera búnar að skora meira. Stjörnuliðið verður að þjappa sér saman og gera betur sem ein heild ef þær ætla að gera einhverja hluti í sumar, en þetta var ansi bragðdauft hjá þeim í dag.
Dómarinn - 8
Dæmdi leikinn bara mjög vel, þó þetta hafi ekki verið erfiður leikur að dæma.