En margt flott hjá íslenska liðinu sem leikur á föstudaginn gegn Noregi. Einkunnir, viðtöl og ýmislegt á leiðinni hér á Fótbolta.net en textalýsingunni er lokið.

Ísland, Ísland, Ísland! heyrist úr stúkunni. Náum við flautumarki??

Ilias Akomach með skot, boltinn af Arnari Daníel og í horn.

Hættuleg fyrirgjöf Spánverja, boltinn yfir Lúkas en sem betur fer enginn Spánverji sem nær til hans. Spænska liðið hættulegt í föstum leikatriðum.

Bjarni Guðjón brýtur af sér og Spánn fær aukaspyrnu með fyrirgjafamöguleika. Bjarni á gulu og þarf að passa sig.

Róbert Frosti Þorkelsson að gera sig kláran í að koma inn.

UEFA gefur upp að það sé 1-13 í marktilraunum, gleymdist að telja allavega eina tilraun frá okkar liði. En Spánverjar miklu betri.

Arnar Daníel í miklu veseni í varnarleiknum og Samuel Omorodion skýtur yfir úr dauðafæri. Ísland heppið að þetta hafi ekki orðið að marki.

Manuel Ángel virðist vera á einhverjum sérsamningi hjá dómaranum. Magnað að hann sé ekki kominn með gult spjald.

Sending úr aukaspyrnunni, náum ekki að skapa okkur skotfæri.

Íslenska liðið átt mjög flottan kafla, halda boltanum vel innan liðsins núna. Adolf Daði fær aukaspyrnu á flottum stað. Mögulega skotfæri.

Stutt hornspyrna hjá Íslandi sem ekkert kemur út úr.

Sending inn í teiginn og Gonzalo skallar í hornspyrnu.

Eggert Aron líflegasti leikmaður íslenska liðsins og krækir í aukaspyrnu á ágætis stað.

Ísland virtist vera að fá vítaspyrnu, Fresneda braut á Daníel Frey. En flaggið fór svo á loft, dæmd rangstaða í aðdragandanum!

Eggert Aron með lofandi sprett en Spánverjar ná að koma boltanum í burtu.

Daníel Freyr og Haukur Andri að gera sig klára í að koma inn.

Gonzalo með fyrirgjöf en boltinn fer af Gísla Gottskálki og til Lúkasar í markinu.

Gonzalo með skot framhjá.

Spánverjar byrja seinni hálfleikinn.

Arnar Daníel Aðalsteinsson, leikmaður Gróttu, er að koma inn á.

Það er kominn hálfleikur hér á Möltu. Spánverjar leiða með einu marki gegn engu en við erum heppnir að forystan sé ekki stærri. Eggert Aron verið langfrískastur af okkar mönnum. Vonandi að okkar drengir nái að svara fyrir sig í seinni hálfleik.

Akomach er búinn að vera að leika sér að íslensku leikmönnunum. Okkar strákar hafa reynt að sparka hann niður en það gengur ekki, hann er alltof lipur.

Það skapast dauðafæri úr hornspyrnunni en Lúkas ver. Svo er dæmd rangstaða.

Þorsteinn Aron liggur eftir og þarf að fara út af í smástund.

Spánverjar hreyfa boltann gríðarlega vel. Gonzalo á svo fyrirgjöf inn á teiginn og reynir Barberá hjólhestaspyrnu. Hann hittir ekki boltann en það gerir Manuel Angel. Hann á fínt skot en Lúkas á enn betri vörslu.

Manuel Ángel, sem er búinn að vera afskaplega góður í liði Spánverja, á hér skot sem fer fram hjá markinu. Ekki langt fram hjá, en þó fram hjá.

Íslenska liðið að ná kafla núna þar sem þeir halda ágætlega í boltann. "Þolimnæði," heyrist kallað inn á vellinum.

Stórhætta eftir hornspyrnu Spánverja en boltinn fer rétt fram hjá fjærstönginni.

Það er ótrúlegt að horfa á þetta spænska lið, alvöru 'tiki-taka' fótbolti sem þeir eru að spila. Íslendingarnir hafa lítið náð að klukka þá enn sem komið er.

Barberá í algjöru dauðafæri á teignum en hittir ekki boltann.

Ilias Akomach, fyrirliði Spánverja, er ekkert eðlilega góður í fótbolta. Þetta er besti leikmaður sem ég hef séð á mótinu hingað til. Hann er nýgenginn í raðir Villarreal frá Barcelona.

Official, confirmed. Ilias Akhomach has joined Villarreal on three year deal valid until June 2026. ???? #Villarreal

Ilias joins as free agent from Barcelona. pic.twitter.com/XOfYDPTsCB

— Fabrizio Romano (@FabrizioRomano) July 3, 2023

Það kemur svo ekkert úr hornspyrnu Spánar.

Akomach enn að valda usla, þessi er rosalega hæfileikaríkur! Valsar fram hjá Eggerti og Guðmundi áður en hann á skot sem fer af Gísla og fram hjá markinu.

Íslenska liðið loksins að sýna sitt rétta andlit. Ná að róa sig og halda boltanum vel um dágott skeið.

Aftur er það Eggert Aron. Við tökum hornspyrnu og boltinn dettur fyrir utan teiginn á miðjumanninn sem kontrar hann í átt að marki. Fer rétt yfir! Eggert að vekja íslenska liðið!

Frábærlega gert hjá Stjörnumanninum. Er agressívur og vinnur boltann. Hann keyrir svo í átt að vörninni og reynir skot sem fer af varnarmanni og fram hjá. Það langbesta sem Ísland hefur sýnt í þessum leik hingað til. Meira svona!

Við töpum boltanum svo um leið og það er hornspyrna hinum megin.

Fín pressa og Íslendingar vinna innkast hátt á vellinum.

Íslendingar tapa boltanum á hættulega stað og Akomach, sem er allt í öllu, keyrir í átt að markinu. Íslendingarnir bakka undan honum og hann fær að fara í skotið en Lúkas gerir vel í að verja það.

Akomach með aukaspyrnu inn á teiginn en Hlynur Freyr skallar frá.

Íslensku stuðningsmennirnir láta heyra í sér eftir markið, hvetja sína menn áfram.

Íslendingarnir hafa ekki náð að halda boltanum. Lúkas hér með markspyrnu sem fer beint í innkast.

Akomach tekur spyrnuna og gefur fyrir. Hann finnur Gonzalo á teignum en skalli hans er yfir markið. Hitti boltann ekki nægilega vel.

Spánn fær aukaspyrnu á ágætis stað. Bæði hægt að skjóta og gefa fyrir.

Stórveldin Barcelona og Real Madrid eiga flesta fulltrúa í byrjunarliði Spánar í kvöld.

Spánverjar í frábæru færi. Góð sókn hjá þeim sem endar með því að Victor Barberá á skalla sem fer rétt fram hjá markinu. Þetta byrjaði allt saman hjá Ilias Akomach, fyrirliða Spánverja. Þarna skall hurð nærri hælum hjá Íslandi.

Ísland fær aukaspyrnu með fyrirgjafarmöguleika. Eggert Aron tekur... En spyrnan er slök og fer aftur fyrir endamörk.

Spánverjar með skalla að marki eftir hornspyrnu en þetta var aldrei líklegt.

Spánverjar að eignast nýjan Carles Puyol í Yarek Gasiorowski? Þeir eru ekki ósvipaðir úr fjarðlægð, útlitslega séð. Gasiorowski einnig í treyju númer 5.

Manuel Ángel með fyrstu skottilraun Spánverja en hún fer vel yfir markið.

Spánverjar í hættulegri sókn og eru komnir inn á teiginn en þar er Bjarni Guðjón mættur til að loka, og hann gerir það vel.

Maður sér það fljótt hversu góðir þær spænsku eru á boltann. Ég ætla að leyfa mér að fullyrða að þeir verða mun meira með boltann í þessum leik.

Það er alveg búið að myrkra hér á Möltu, enda er klukkan orðin 21:15 að staðartíma. Það er frábært veður til fótboltaiðkunnar, alls ekki of heitt.

Þá er þetta farið af stað. Guðmundur Baldvin átti upphafsspyrnu Íslands á þessu móti!

Þjóðsöngvarnir að baki. Afskaplega vel sungið hjá strákunum!

Það mega bara vera 20 leikmenn í leikdagshópnum og því er Ásgeir Orri Magnússon, markvörður Keflavíkur, utan hóps í kvöld. Hann situr upp í stúku með starfsfólki KSÍ.

Strákarnir hafa lokið upphitun og eru farnir inn í klefa. Það eru um tíu mínútur í að flautað verði til leiks.

Íslenska stuðningsfólkið er auðvitað mætt á völlinn og mun vonandi styðja vel við bakið á liðinu. Á meðal stuðningsmanna er Alexander Petersson, handboltagoðsögn með meiru. Ég spjallaði við hann fyrir leik en hægt er að horfa á það viðtal með því að smella hérna.

Það hefur verið mikill hiti á Möltu frá því ég lenti á laugardaginn, alveg um 30 stiga hiti plús á daginn. En það kólnar alltaf aðeins á kvöldin og núna er hitinn kominn niður í um 25 stig sirka. Það er líka smávegis gola sem er býsna þægilegt.

Mjög eðlilegur fótboltaleikur að klárast

Næst er það ???????????????? í beinni textalýsingu á @Fotboltinet pic.twitter.com/ZFslQmrLei

— Guðmundur Ásgeirsson (@gummi_aa) July 4, 2023

Þrjár breytingar eru á liðinu frá síðasta leik liðsins í milliriðli fyrir mótið. Orri Steinn Óskarsson og Kristian Nökkvi Hlynsson fengu ekki leyfi frá félagsliðum sínum til að taka þátt í mótinu og Sigurbergur Áki Jörundsson tekur sér sæti á bekknum. Inn koma þeir Guðmundur Baldvin Nökkvason, Bjarni Guðjón Brynjólfsson og Ágúst Orri Þorsteinsson. Sjö leikmenn í byrjunarliðinu spila í Bestu deildinni, þrír spila í Lengjudeildinni og Lúkas í markinu spilar með U23 liði Hoffenheim.

Undirritaður fór á æfingu í gær og tók nokkrar myndir. Strákarnir voru vel stemmdir á æfingunni og það var létt yfir hópnum.

Spánverjar eru með tvo verðmætustu leikmenn mótsins. Bakvörðurinn Ivan Fresneda er lang verðmætasti leikmaður mótsins en hann hefur verið orðaður við ýmis stórlið í Evrópu. Þetta verður gríðarlega erfitt verkefni en það má heyra á strákunum að þeir hafa fulla trú á verkefninu.

Hvaða leikmaður á EM U19 er með hæsta markaðsvirðið? https://t.co/ThEpzrXJ83

— Fótbolti.net (@Fotboltinet) July 4, 2023

Verkamaðurinn Lana fékk starfið óvænt í hendurnar - „Hefði aldrei getað ímyndað mér þetta“ https://t.co/Y9QnN3q2Rp

— Fótbolti.net (@Fotboltinet) July 4, 2023

Það er alveg hægt að setja spurningamerki við það að þetta mót sé ekki spilað í landsliðsglugga.

„Það er örugglega ótrúlega leiðinlegt að fá þessar fréttir" https://t.co/labvJKOS1G

— Fótbolti.net (@Fotboltinet) July 4, 2023

Íslenska liðið er án lykilmanna á þessu móti. Það er ekki landsleikjagluggi þegar U19 keppnin fer fram og því geta félagslið bannað leikmönnum sínum að spila fyrir þjóð sína á mótinu. Kristian Nökkvi Hlynsson og Orri Steinn Óskarsson, tvær stærstu stjörnur liðsins, fengu ekki leyfi frá félagsliðum sínum til að fara með íslenska liðinu til Möltu þar sem þeir eru að fara inn á undirbúningstímabil. Núna síðast - í vikunni fyrir mótið - var svo Daníel Tristan Guðjohnsen meinað að fara með en hann er í aðalliði Malmö í Svíþjóð og er orðinn hluti af hópnum þar þrátt fyrir að vera 17 ára gamall. Það varð líka ljóst rétt fyrir mót að Hilmir Rafn Mikaelsson, leikmaður Tromsö, gat ekki spilað með vegna meiðsla. "Auðvitað er þetta högg en við getum ekkert gert í þessu. Við erum með mjög hæfileikaríkan hóp. Þessi vegferð hefur samt alltaf snúist um liðið, ekki um einstaklinga. Við lifum eftir því. Við erum með leikmenn sem hafa komið inn og staðið sig mjög vel. Þetta er ekki áhyggjuefni," sagði Ólafur Ingi Skúlason, landsliðsþjálfari, í gær. Orri Steinn Óskarsson.

1. Lúkas J. Blöndal Petersson, Hoffenheim 2. Hlynur Freyr Karlsson, Valur 3. Arnar Númi Gíslason, Grótta 4. Logi Hrafn Róbertsson, FH 5. Þorsteinn Aron Antonsson, Selfoss 6. Sigurbergur Áki Jörundsson, Stjarnan 7. Bjarni Guðjón Brynjólfsson, Þór Ak. 8. Gísli Gottskálk Þórðarson, Víkingur R. 9. Adolf Daði Birgisson, Stjarnan 10. Eggert Aron Guðmundsson, Stjarnan 11. Guðmundur Baldvin Nökkvason, Stjarnan 12. Halldór Snær Georgsson, Fjölnir 13. Jóhannes Kristinn Bjarnason, KR 14. Daníel Freyr Kristjánsson, FC Midtjylland 15. Galdur Guðmundsson, FC Kaupmannahöfn 16. Róbert Frosti Þorkelsson, Stjarnan 17. Haukur Andri Haraldsson, ÍA 18. Arnar Daníel Aðalsteinsson, Grótta 19. Ágúst Orri Þorsteinsson, Breiðablik 20. Benóný Breki Andrésson, KR 21. Ásgeir Orri Magnússon, Keflavík

Ég hef síðustu daga rætt við þjálfara og leikmenn Íslands fyrir stóru stundina. Hér fyrir neðan eru tenglar á viðtöl sem ég hef tekið: Gísli Gottskálk: Við fyrstu sýn var ég smá stressaður Lúkas fór aðra leið en foreldrarnir: Stoltur að vera í íslenska landsliðinu Markmiðið að komast upp úr riðlinum - „Þeir eru ekkert betri en við“ Þurfti að aflita á sér hárið síðast en hvað er það næst? Aldrei hægt að vanmeta Ísland - „Erum með lið og gæðin í það“ Lúkas Petersson

Noregur og Grikkland eru einnig í riðli Íslands, en þau lið mætast í dag klukkan 16:00. Svona er leikjadagskrá Íslands í riðlinum: Þriðjudagur 4. júlí 19:15 Ísland - Spánn (Centenary Stadium) Föstudagur 7. júlí 19:00 Ísland - Noregur (Tony Bezzina Stadium) Mánudagur 10. júlí 19:00 Grikkland - Ísland (Tony Bezzina Stadium)

Íslenska liðið tók þátt í fyrsta undanriðlinum í nóvember á síðasta ári þar sem liðið var með Frakklandi, Kasakstan og Skotlandi. Strákarnir unnu leiki sína gegn Skotlandi og Kasakstan, en töpuðu 2-0 gegn Frakklandi. Það dugði liðinu til að komast áfram því tvö lið fóru áfram upp úr riðlinum og í milliriðla. Undanriðill 8 1. Frakkland - 9 stig 2. Ísland - 6 stig 3. Skotland - 3 stig 4. Kasakstan - 0 stig Milliriðlarnir fóru fram í mars á síðasta ári en Ísland var í riðli með Englandi, Ungverjalandi og Tyrklandi. Þá var verkefnið erfiðara því aðeins eitt lið fór upp úr riðlinum. Riðillinn fór fram á Englandi, en hann byrjaði erfiðlega fyrir Ísland þar sem liðið gerði 2-2 jafntefli gegn Tyrklandi eftir að hafa verið lengst af einum fleiri og á kafla tveimur fleiri. En strákarnir svöruðu því með stórkostlegum sigri á Englandi og svo flottum sigri gegn Ungverjum. Milliriðill 7 1. Ísland - 7 stig 2. England - 6 stig 3. Tyrkland - 2 stig 4. Ungverjaland - 1 stig Úr sigri Íslands gegn Englandi.

Og verið velkomin í beina textalýsingu frá Möltu þar sem U19 landslið Íslands hefur leik á lokakeppni Evrópumótsins. Fyrsti leikur er gegn Spánverjum, sigursælasta liði í sögu keppninnar.