FRÉTTIR01.12.2025, 17:53
Aron Einarsson er genginn í raðir Njarðvíkur en hann kemur á frjálsri sölu frá Leikni þar sem samningur hans var runninn út. Hann skrifar undir tveggja ára samning við félagið.
Hann er þriðji leikmaðurinn sem Njarðvík fær í vetur en fyrr í þessum mánuði sömdu þeir Eiður Aron Sigurbjörnsson og Alex Freyr Elísson við Njarðvíkinga.
Aron er 23 ára miðjumaður sem uppalinn er hjá Selfossi og hafði þar til 2024 leikið allan sinn feril með uppeldisliðinu. Hann gekk í raðir Leiknis eftir tímabilið 2023 og lék 34 leiki í Lengjudeildinni með Breiðhyltingum.
FRÉTTIR01.12.2025, 17:30
Ýmir Már Geirsson hefur framlengt samning sinn við Þór út tímabilið 2026. Hann er 28 ára vinstri bakvörður sem kom til Þórs fyrir tímabilið 2023. Hann hjálpaði Þór að vinna Lengjudeildina í sumar og verður með liðinu í Bestu deildinni á næsta tímabili.
Hann lék 19 leiki í Lengjudeildinni í sumar og hefur hann nú leikið alls 55 leiki fyrir Þór en hann hefur einnig leikið með Magna, Dalvík/Reyni og fyrir uppeldisfélagið KA á meistaraflokksferli sínum.
Hann kom inn í lið Þórs í 10. umferð Lengjudeildarinnar í sumar og leit ekki um öxl, byrjaði alla leiki nema einn eftir leikinn gegn Fjölni. Sigurður Heiðar Höskuldsson, þjálfari Þórs, ræddi um Ými í viðtali fyrr í vetur.
FRÉTTIR30.11.2025, 20:07
Ágúst Eðvald Hlynsson er genginn til liðs við Þór en hann snýr aftur til liðsins eftir fjórtán ára fjarveru.
Ágúst er fæddur árið 2000 en hann kemur til liðsins frá Vestra þar sem hann varð bikarmeistari í sumar. Hann er uppalinn hjá Þór en fór til Breiðabliks í 4. flokki árið 2012. Hann hefur einnig spilað með Víking, FH og Val hér á landi.
FRÉTTIR30.11.2025, 11:57
Markvörðurinn Aron Dagur Birnuson hefur verið lánaður frá Stjörnunni til Þróttar Reykjavíkur í Lengjudeildinni.
FRÉTTIR29.11.2025, 17:31
Atli Sigurjónsson er kominn aftur til Þórs en hann kemur frá KR. Hann skrifar undir tveggja ára samning.
Atli er uppalinn hjá Þór og var Íslandsmeistari með liðinu í 5. og 3. flokki. Hann hóf ferilinn með aðalliðinu aðeins 16 ára gamall og spilaði í næst efstu deild frá 2008-2010. Hann var lykilmaður í liðinu árið 2010 þegar Þór tryggði sér sæti í efstu deild.
FRÉTTIR29.11.2025, 12:39
Viktor Andri Hafþórsson er kominn aftur heim í Fjölni en hann kemur til félagsins frá Þrótti R.
FRÉTTIR29.11.2025, 12:19
Andri Rafn Yeoman, leikjahæsti leikmaður í sögu Breiðabliks, hefur gert nýjan eins árs samning við félagið.
FRÉTTIR28.11.2025, 20:47
Murielle Tiernan hefur staðfest ákvörðun sína um að yfirgefa Fram eftir að hafa verið meðal allra bestu leikmanna liðsins á nýliðinni leiktíð.
FRÉTTIR28.11.2025, 20:00
Síleski þjálfarinn Manuel Pellegrini er búinn að framlengja samning sinn við Real Betis um eitt ár. Hann gildir núna til sumarsins 2027, eða í eitt og hálft ár.
FRÉTTIR28.11.2025, 16:57
Varnarmaðurinn reynslumikli Damir Muminovic hefur samið við Lengjudeildarlið Grindavíkur. Félagið tilkynnti þetta nú síðdegis en markvörðurinn Hjörvar Daði Arnarsson var kynntur við sama tilefni.
Damir er 35 ára miðvörður sem tvisvar hefur orðið Íslandsmeistari með Breiðabliki. Kópavogsfélagið tilkynnti það nýlega að ekki yrði gerður nýr samningur við hann.
FRÉTTIR28.11.2025, 12:28
Vestri hefur samið við Senegalann Pape Abou Cisse, frá þessu greinir félagið í dag.
Pape er þrítugur að aldri, 1,97 cm á hæð, örvfættur og spilar sem hafsent. Hann býr yfir gríðarlegum styrk og hraða. Hann á 16 landsleiki fyrir Senegal og vann með þeim Afríkukeppnina árið 2022.
FRÉTTIR27.11.2025, 20:24
Þórður Gunnar Hafþórsson er kominn aftur heim í Vestra eftir að hafa spilað með Aftureldingu og Fylki síðustu sex tímabil.
FRÉTTIR27.11.2025, 18:50
Björg Gunnlaugsdóttir er gengin í raðir Þróttar frá FHL, en þetta kemur fram í tilkynningu Þróttara í dag.
FRÉTTIR27.11.2025, 15:02
Fram hefur krækt í Brookelynn Paige Entz en hún kemur til félagsins frá Grindavík/Njarðvík. Hún er öflugur sóknarsinnaður leikmaður sem hefur spilað síðustu fjögur tímabil á Íslandi.
Hún varð Íslandsmeistari með Val 2022 og lék svo með HK 2023-24. Á síðasta tímabili lék hún svo með Grindavík/Njarðvík og hjálpaði liðinu að fara upp úr Lengjudeildinni. Hún hefur verið í liði ársins í Lengjudeildinni þrjú ár í röð.
Hún á að baki 49 leiki í B-deild og hefur í þeim skorað 29 mörk. Hún skoraði eitt mark í ellefu deildarleikjum með Val.
Hún er fyrsti leikmaðurinn sem Fram fær í vetur. Anton Ingi Rúnarsson tók við sem þjálfari liðsins í upphafi mánaðar.
FRÉTTIR27.11.2025, 13:26
Aron Jóhannsson hefur verið leystur undan samningi hjá Val og er honum nú frjálst að semja við annað félag. Valur greinir frá tíðindinum með tilkynningu.
Aron, sem er 35 ára sóknarsinnaður miðjumaður, átti eitt ár eftir af samningi sínum við Val. Hann lék framan af á ferlinum sem framherji en spilaði yfirleitt aðeins aftar hjá Val.
Hann kom til félagsins frá Lech Poznan haustið 2021 og var því hjá félaginu í fjögur tímabil. Hann lék sem atvinnumaður í rúman áratug, fyrst hjá AGF í Danmörku, svo AZ í Hollandi, var hjá Werder Bremen í Þýskalandi, Hammarby í Svíþjóð og loks Lech Poznan í Póllandi. Hann lék á sínum tíma 10 leiki með U21 landsliði Íslands, 19 A-landsleiki fyrir Bandaríkin og spilaði á HM 2014.
FRÉTTIR27.11.2025, 09:56
Gígja Valgerður Harðardóttir, fyrirliði Víkings, hefur ákveðið að flytja norður yfir heiðar. Hún yfirgefur því Víking. Hún er kærasta Atla Sigurjónssonar sem kvaddi KR í gær.
Varnarmaðurinn lék fyrst með sameiginlegu liði HK/Víkings og sneri svo aftur í Víking fyrir tímabilið 2024.
Gígja Valgerður er 34 ára og er uppalin hjá Völsungi og varð Íslandsmeistari með Þór/KA árið 2012.
FRÉTTIR26.11.2025, 19:36
Jóhannes Karl Guðjónsson er tekinn við FH og gerir fjögurra ára samning en þetta kemur fram í tilkynningu félagsins. Árni Freyr Guðnason verður aðstoðarmaður hans.
FRÉTTIR26.11.2025, 18:50
Knattspyrnudeild ÍR hefur gengið frá félagaskiptum Halldórs Atla Kristjánssonar frá Augnabliki en hann var kynntur hjá Breiðhyltingum í kvöld.
FRÉTTIR26.11.2025, 17:00
Valur tilkynnti í dag að Christopher Brazell væri orðinn aðstoðarþjálfari meistaraflokks karla hjá félagiu. Hann var ráðinn til félagsins fyrr á þessu ári og kom þá inn sem afreksþjálfari. Hann verður aðstoðarmaður Hermanns Hreiðarssonar sem var ráðinn til félagsins fyrr í þessum mánuði. Hermann tók við þjálfarastarfinu af Srdjan Tufegdzic og Chris tekur við starfinu af Hauki Páli Sigurðssyni.
Chris kom til Vals eftir að hafa verið hjá Gróttu, bæði sem aðstoðarþjálfari og svo aðalþjálfari. Hann er 33 ára Englendingur sem er með UEFA Pro þjálfaragráðuna og er einn yngsti þjálfarinn til að fá þá gráðu.
FRÉTTIR26.11.2025, 14:26
Atli Sigurjónsson er farinn frá KR, þetta staðfestir félagið með kveðjufærslu á samfélagsmiðlum í dag. Þar kemur fram að Atli sé að flytja til Akureyrar og samkvæmt heimildum Fótbolta.net er hann á leið í Þór.
Atli, sem er 34 ára, er uppalinn hjá Þór. Hann hélt suður og samdi við KR eftir tímabilið 2011 með Þór. Hann vann deildina tvisvar sinnum með KR og bikarinn tvisvar.
Í sumar kom hann við sögu í 17 leikjum og lagði upp fjögur mörk í Bestu deildinni.
