Björg Gunnlaugsdóttir er gengin í raðir Þróttar frá FHL, en þetta kemur fram í tilkynningu Þróttara í dag.
Björg er fædd árið 2006 og spilaði 21 leik með FHL í Bestu deildinni í sumar.
Þrátt fyrir ungan aldur hefur hún spilað 112 leiki og skorað 27 mörk í öllum keppnum með FHL.
Einnig hefur hún spilað sjö landsleiki með yngri landsliðum Íslands og nú síðast í 2-1 sigri U19 ára landsliðsins á Skotlandi í febrúar.
Björg hefur samið við Þrótt og er hún í skýjunum með félagaskiptin.
„Að ganga til liðs við Þrótt er spennandi skref fyrir mig, ég hef séð hversu öflugt starfið er hér og ég hlakka ótrúlega mikið til að spila í Laugardalnum, hitta hópinn og leggja mitt af mörkum á vellinum,“ sagði Björg við undirskrift.
Hún er yngri systir Íslands- og bikarmeistarans Áslaugar Mundu sem á 21 landsleik að baki með A-landsliðinu.
Athugasemdir
