Heimild: Teamtalk
Steve Cotterill, stjóri Portsmouth, segir að Hermann Hreiðarsson sé ekki ennþá tilbúinn að koma inn í byrjunarliðið.
Hermann hefur komið inn á sem varamaður í síðustu leikjum Portsmouth en hann er hægt og bítandi að ná fyrri styrk eftir að hafa slitið hásin á síðasta tímabili.
,,Eins og staðan er þá er hann ekki alveg tilbúinn svo við höldum honum aðeins til baka," sagði Cotterill.
Carl Dickinson hefur verið í leikbanni og því hefur hinn réttfætti Joel Ward leikið í vinstri bakverðinum hjá Portsmouth að undanförnu. Cotterill er ánægður með að geta notað Hermann sem varamann í leikjum þessa stundina.
,,Það er frábært að henda honum inn á seint í leikjum og biðja hann um að hlaupa um frammi og hjálpa okkur að skalla boltann burt úr okkar vítateig."
,,Í augnablikinu er hann ekki tilbúinn í að byrja. Gleymum samt ekki að Joel hefur staðið sig vel þarna."