Svolítið skrifað í skýin þegar Aron fór og dró
„Þetta verður bara alvöru leikur og við berum fulla virðingu fyrir Aftureldingu. Við mætum með öflugt lið, ætlum að vera í pottinum eftir þann leik," sagði Arnar Grétarsson, þjálfari Vals, við Fótbolta.net eftir að dregið var í Mjólkurbikarnum í hádeginu.
Valur heimsækir Aftureldingu í 16-liða úrslitum keppninnar í næsta mánuði. Uppaldi Valsarinn Aron Elí Sævarsson dró Valskúluna upp úr pottinum. Hann er fyrirliði Aftureldingar.
Valur heimsækir Aftureldingu í 16-liða úrslitum keppninnar í næsta mánuði. Uppaldi Valsarinn Aron Elí Sævarsson dró Valskúluna upp úr pottinum. Hann er fyrirliði Aftureldingar.
Lestu um leikinn: Valur 3 - 0 FH
„Þeir eru með flott lið, voru hársbreidd frá því að komast upp í fyrra. Þeir spila skemmtilegan fótbolta. Mér fannst þetta svolítið skrifað í skýin þegar ég sá hann fara þarna upp að draga bróður sinn. Þetta verður skemmtilegt verkefni."
Umhugsunarefni að það séu engar afleiðingar
Valur sló út FH í 32-liða úrslitunum. Stærsta umræðuefnið eftir þann leik er tækling Grétars Snæs Gunnarssonar í lok leiks. Grétar fékk rautt spjald fyrir tæklingu á Adam Ægi Pálssyni.
„Mér fannst þetta alveg gjörsamlega galin tækling. Hann fer aftan í manninn, allavega önnur löppin er mjög hátt og það er rosalegur hraði. Sem betur fer hoppaði Adam eiginlega upp. Ef hann stígur í lappirnar þarna þá er þetta tækling sem getur eyðilagt ferla hjá mönnum," sagði Arnar.
Hann nefnir svo þá staðreynd að spjöld í bikarnum gilda ekki í deildinni.
„Þessi rauðu spjöld skipta ekki máli. Þarna er komið eftir 80. mínútu í leiknum, leikurinn er tapaður og menn geta gert svona hluti og það eru engar afleiðingar. Það held ég að sé umhugsunarefni. Mér finnst að menn megi allavega hugsa um það (að spjöldin gildi líka í deildinni). Svona hlutir, eins og þessi tækling, þeir eru dottnir út og hún hefur engar afleiðingar. Maður vill ekki sjá svona hluti, þetta er hættulegt og á ekki að sjást," sagði þjálfarinn.
Viðtalið við hann í heild sinni má sjá í spilaranum efst.
Athugasemdir