Sex áhugaverðum leikjum var að ljúka í ensku úrvalsdeildinni nú fyrir stuttu. Þetta voru leikir sem hófust klukkan 15:00, en 14. umferð deildarinnar er spiluð um helgina og þetta voru leikir í þeirri umferð.

Aðalleikurinn var leikur Tottenham og Swansea á White Hart Lane, en Gylfi Þór Sigurðsson sneri þar á sinn gamla heimavöll. Þessi heimsókn hjá Gylfa og félögum fór hins vegar ekki vel, reyndar bara mjög illa.

Tottenham valtaði yfir Swansea á stuttum tíma í lok fyrri hálfleiks og byrjun seinni hálfleiks og það gerði útslagið. Christian Eriksen setti tvö mörk seint í seinni hálfleiknum og kláraði leikinn endanlega; lokatölur 5-0 fyrir Tottenham.

Gylfi spilaði allan leikinn hjá Swansea, en náði ekki að láta að sér kveða. Að öðrum úrslitum þá vann Crystal Palace mikilvægan sigur á Southampton, en Christian Benteke setti tvö mörk í 3-0 sigri.

Jóhann Berg var á meiðslalistanum hjá Burnley sem tapaði 2-0 gegn Stoke og þá töpuðu Englandsmeistarar Leicester gegn botnliði Sunderland, en Leicester færist nær fallsætunum. West Brom vann svo 3-1 sigur gegn Watford á heimavelli.