Hjörtur Hermannsson var svekktur í leikslok.
Hjörtur Hermannsson, varnarmaður íslenska landsliðsins, var að vonum svekktur eftir að liðið datt út eftir 1-1 jafntefli gegn Danmörku í umspili um sæti á EM 2015 í dag.
Ísland fékk á sig mark á 90. mínútu, jafnaði svo metin en datt úr leik á útivallarmörkum.
Ísland fékk á sig mark á 90. mínútu, jafnaði svo metin en datt úr leik á útivallarmörkum.
,,Þetta er gríðarlega súrt epli að bíta í, en maður er fyrst og fremst stoltur af þessari frammistöðu. Þetta er ótrúlegur hópur og alveg ótrúleg frammistaða sem við höfum skilað af okkur, ekki bara í þessum tveimur leikjum heldur allri keppninni. Það er bara heiður að vera partur af svona flottum hóp og maður er þvílíkt spenntur fyrir næsta verkefni, þó það sé langt í það," sagði Hjörtur við Fótbolta.net.
,,Við áttum okkar kafla í leiknum en að sjálfsögðu hefðum við viljað að þeir yrðu mikið fleiri en þeir voru. En við stóðum allavega vel í þessu liði. Þetta er lið sem spilaði skemmtilegasta fótboltann alla undankeppnina og skoraði flest mörkin, við getum verið stoltir af okkar frammistöðu og horft til framtíðar."
Hjörtur viðurkennir að það hafi verið afskaplega svekkjandi að mark var dæmt af Ólafi Karli Finsen undir lokin þegar staðan var enn 0-0.
,,Maður er svo fullur af tilfinningum í miðjum leiknum, en ætli þetta sé ekki rétt. Þessir markmenn eru heilagir þegar þeir eru inni í sínu eigin boxi, er það ekki?"
Athugasemdir
