Cardiff og Charlton Athletic gerðu markalaust jafntefli í Wales í kvöld, en liðið er í fyrsti sæti deildarinnar með 84 stig, sjö stigum á undan Hull City sem tapaði. Watford, sem situr í þriðja sæti tapaði einnig, en liðið er með 71 stig.

Þetta þýðir það að Cardiff er komið í deild þeirra bestu á Englandi, en þrír leikir eru eftir af tímabilinu. Aron Einar Gunnarsson lék allan leikinn í liði Cardiff, en Heiðar Helguson var fjarri góðu gamni.

,,Þetta hefur tekið langan tíma að gerast, en núna erum við komnir þangað. Ég er ekki búinn að átta mig á þessu, ég sé bros út um allt og nóttin í Cardiff kemur til með að vera ansi löng!," sagði Mackay.

,,Það er mikið af fólki hér sem hefur gengið í gegnum erfiða tíma. Þetta er fyrir það fólk."

,,Þetta er fyrir starfsfólkið, bæði á skrifstofunni og það fólk sem vinnur á æfingasvæðinu, þetta er fyrir stjórnina, fólkið sem hefur unnið hér síðustu ár, leikmennina og að sjálfsögðu stuðningsmennina. Þetta kvöld er tileinkað þeim," sagði hann að lokum.