Ýmsa þjálfara má einnig flokka sem skemmtikrafta. Football 365 tók saman lista yfir tíu litríka þjálfara sem kunna að vekja eftirtekt áhorfenda og fjölmiðla.
10) Marcelo Bielsa - Þjálfari Athletic Bilbao er afar sérstakur en skemmtilegur karakter sem lætur lið sín spila skemmtilegan fótbolta. Gríðarlega hreyfanlegur við hliðarlínuna.
9) Jurgen Klopp - Einn af fáum þjálfurum sem er í alvöru opinn og skemmtilegur í viðtölum. Smá nördalegur en stýrir frábæru fótboltaliði.
8) Zdenek Zeman - Fyrrum þjálfari Roma er maður fárra orða en er skemmtilegur karakter. Heldur fast í þá hugmyndafræði að skora fleiri mörk en andstæðingurinn og er óhræddur við að básúna til sóknar.
7) Ricardo La Volpe - Óútreiknalegur þjálfari sem þekktur var fyrir sprengjuregn í fjölmiðlum. Sagði þrisvar af sér sem þjálfari Mexíkó í útvarpsviðtali en kannaðist ekkert við það daginn eftir.
6) Sir Alex Ferguson - Eftir 26 ár hjá Manchester United. 900 sigra og 37 bikara veit hann ekki enn hvernig á að fagna marki! Hleypur hömlulaus að hliðarlínunni. Hefur farið í ófá sálfræðistríðin og sögurnar eru óteljandi.
5) Graeme Souness - Náði ekki sömu hæðum sem þjálfari og sem leikmaður. Á heiðurinn af kaupum á "frænda George Weah" sem reyndist versti leikmaður ensku úrvalsdeildarinnar frá upphafi. Maðurinn sem plantaði Galatasaray fána á völl Fenerbahce eftir að hafa stýrt liðinu til sigurs gegn erkifjendum sínum.
4) Paolo Di Canio - Ótrúlega ástríðufullur. Sem stjóri Swindon reifst hann við leikmenn, hljóp óvart hálfmaraþon gegnum bæinn og pantaði pizzur fyrir stuðningsmenn. Stuðningsmenn Sunderland geta farið að hlakka til.
3) Jose Mourinho - Alltaf í sviðsljósinu! Talar í fyrirsögnum, fagnar af innlifun, eitursvalur og hefur potað í augað á Tito Vilanova.
2) Diego Maradona - Það er hægt að telja upp ansi margar ástæður fyrir því að Maradona sé skemmtilegur karakter. Skemmtileg staðreynd að hann notaði 108 leikmenn á 18 mánuðum sem þjálfari Argentínu.
1) Brian Clough - "Ég myndi ekki segja að ég hafi verið sá besti í bransanum en ég var í topp einum," sagði Clough. Gerði marga andstæðinga brjálaða með ýmsum ummælum sínum. Heillandi maður sem náði frábærum árangri með Derby og Nottingham Forest. Kvikmyndin "The Damned United" er skylduáhorf fyrir fótboltaáhugamenn.
Athugasemdir
