"Við vitum að við erum mikið betri en þetta."
Jóhannes Karl Guðjónsson og félagar í Fylki áttu mjög dapurt kvöld þegar þeir töpuðu 1-5 fyrir 1. deildarliði KA í 8-liða úrslitum Lengjubikarsins. KA komst tveimur mörkum yfir strax í blábyrjun leiksins og eftir Fylkir missti mann af velli með rautt spjald var þetta aldrei spurning.
„Þeir byrjuðu þetta af miklu meiri krafti en við. Þetta var kæruleysisleg byrjun og við fengum á okkur tvö mörk. KA er með hörkulið og gerði þetta vel en að sama skapi vorum við klaufar," sagði Jóhannes Karl.
„Við missum líka aðeins hausinn við að missa mann af velli. Mér fannst þetta mjög ósanngjarnt og það tók tíma að jafna sig. Þetta var aldrei rautt spjald, gult hefði verið fínt og við hefðum getað haldið áfram."
„Mörkin tvö sem við fengum á okkur í seinni hálfleik gáfum við á silfurfati. Ég ætla ekki að taka neitt af KA. Þeir eru með mjög gott lið sem á sjálfsagt eftir að gera mjög góða hluti í 1. deildinni. Það verður gaman að fylgjast með þeim í sumar."
„Það hefur verið stígandi hjá okkur og við höfum verið að fá á okkur lítið af mörkum svo við verðum að skoða þennan leik. Það er fullt sem við getum lært af þessum leik og kannski fínt að fá þetta núna. Við höfum nóg að vinna í, við ætlum að vera klárir í fyrsta leik í Pepsi-deildinni. Við vitum að við erum mikið betri en þetta."
Viðtalið má sjá í heild í sjónvarpinu hér að ofan.
Athugasemdir
