Heimild: Goal.com
Ítalskir fjölmiðlar greina frá því að Angelomario Moratti, varaforseti Evrópu- og Ítalíumeistara Inter Milan, hafi fundað með forráðamönnum þýska liðsins Hoffenheim í Mílanóborg í gær.
Samkvæmt vefmiðlinum Goal.com, sem vitnar í frétt sem birtist í íþróttablaðinu Tuttosport í morgun, ríkti nokkur leynd yfir fundinum sem mun hafa snúist um áhuga Inter á tveimur leikmönnum þýska liðsins, Gylfa Þór Sigurðssyni og varnarmanninum Andreas Beck.
Ekkert er vitað um niðurstöðu fundarins né hvort forráðamenn félaganna hyggjast ræða saman á nýjan leik.
Gylfi Þór er ósáttur við stöðu sína hjá Hoffenheim en hann hefur fengið fá tækifæri með liðinu að undanförnu þrátt fyrir að vera markahæsti leikmaður liðsins á tímabilinu.
Inter er ekki fyrsta stórliðið sem hann er orðaður við en Atletico Madrid, Juventus, AC Milan, Manchester United og Arsenal eru öll sögð hafa augastað á leikmanninum.
